John Laurence, di profesion piscado y presidente di e Piscadonan na Rancho di Clemente, tin un experencia di 40 aña. Y ta un di e tantisimonan cu ta preocupa pa destino di Paulus (Pau) Martijn, kende ta perdi for di diasabra, 29 di februari ultimo.
“Pau ta un persona hopi recto, cautoloso y preocupa cu siguridad,” Lourens a comete. Su profesion di buceado a hib’e traha na paisnan hopi leu di Aruba despues cu refineria a cera. “Bucea no solamente tabata su profesion pero su hobby tambe,” Laurence a comenta.
Bajo
Bajo, unda cu Pau y su amigonan (Reangulo Stamper, Franklin Vos y Robert Laveist) a bay tira pisca, ta un area basta leu cu ta cay den teritorio Venezolano. “Bajo ta un teritorio seco, di mas o menos 13 braza hundo y ta keda pafo di awanan teritorial di Aruba, zuid ariba di Aruba. Ta dura un ora y mey prome cu yega eynan nabegando den bon tempo. E ta un area rico na pisca pa cual piscadonan gusta pa bay tira pisca den e area ey. E ta un luga cu hopi aña cu piscadonan di Savaneta ta bay eynan.” E ta un area cu tin tribonnan masha grandi ta draai rond tambe.
El a splica tambe cu ora cu bay Bajo, esun cu ta keda den boto tin bida di e otronan den su man. Mester ta semper atento di kico ta tuma luga cu e boei ora cu baha sambuya. Mester keda riba e boei, wak oloshi bon, coy number di GPS, y conta cuanto tempo nan ta keda abou pa sa ki ora nan mester bin laira pa decompres. “Mi no ta un sambuyado, pero mi a siña con pa traha cu nan,” Laurence a splica. “Si tempo pasa, mester controla wak kico ta pasando. Tin señal cu por haci, pone un tanki den awa y bati cu hero pa mira si tin reaccion, si boso ta dos so. Si tin un di tres hende, e mester baha wak.”
Busca unda coriente ta bay
Si tin cualkier problema, wak unda coriente ta saca un hende y tira bista den e direccion ey. Si e persona keda perdi, lo mester busca contacto cu tera. “P’esey ta importante pa tin radio abordo pa haya comunicacion cu esnan den bisindario y meld na tera. Ami den casonan asina lo marca mi posicion, bay den area unda por haya comunicacion via celular bati alarma, y bolbe na mi posicion,” Laurence a bisa.
Awendia no ta tur piscado tin un radio, pasobra mester ta inscribi na Directie Telecommunicatie, cu ta costa placa, mientras e ta algo importante pa e piscadonan. Un telefon satelital, por coy tur caminda, pero na Aruba no tin e servicio ey. Awo e exigencianan pa e botonan ta: EHBO Kit, Flares, spiel, boei cu tanto meter di cabuya, vest. Cada seis luna ta controla esaki, pa haya permiso pa pisca rond di e isla.
Pau
Pau Martijn ta un bon amigo di nan y conoci como un persona corecto pa cumpli cu reglanan di siguridad. Ora cu alarma a wordo bati cu e ta perdi, ya caba mayoria di boto tabata aden caba. E siguiente mainta diferente piscado cu a sali, a tira bista.
Riba e diasabra ey, tabatin algun boto mas panort y mas pariba, y nan ta corda cu awa tabata bay nort/abou y cerca di Aruba abou. E ta corda ainda cu algun amigo cu a bay Fuikdag, cu a lesa compas malo, y a bay masha leu mes di Aruba.
Den e caso aki, aunke basta dia a pasa caba, Laurence ta bisa cu “nada ta imposibel”.
