Un rato pasa pa mas o menos 9:40am Polis a detene e dos fugitivonan Joander RAMIREZ y Jorge RAMIREZ na un cas na Macuarima. Na e cas tambe a detene pareha di un di e fugitivonan, Edgarina Angela pa articulo 2:146 di nos codigo penal. E accion a inclui presencia di helicopter y varios Polis den henter e area.
Articulo 2:146 di nos codigo penal ta bisa cu libera of yuda na liberacion di un persona cu tin un castigo di prison ta castigabel cu maximo 4 aña di prison.
E dos rumannan a scapa riba diahuebs dia 15 di augustus ultimo for di KIA. A ranca pochi di WC, pasa bou tera, sali den cura, subi dak y despues perde den scuridad di anochi.
E dos fugitivonan ta cera pa un lista di atraco cometi tur rond di nos isla. No obstante nan edad hoben, nan tabata hopi activo den atraca negoshinan y hasta arma. Den un caso nan a hasta los tiro riba un Chines den un supermercado.
Nan mama a suplica nan algun dia pasa, den un entrevista exclusivo na 24ora.com, pa nan entrega nan mes na autoridad. Nan no a cumpli cu e deseo di nan mama, pero awe Polisnan atento a caba cu nan status di fugitivo despues di 12 dia di liberacion “forsa”.
