Desde 1 di juli 2018 e isla di Aruba a haña transferencia pa districto 35N hunto cu nos isla ruman nan Bonaire y Curacao. Di e forma aki district 35N a keda oficialisa como: Florida, Bahamas, Aruba, Bonaire y Curacao.
Esaki a trece un vuelta completamente nobo pa locual ta trata e trabow di leomismo. Pa locual ta e ultimo aña leoinistico 2018 -2019, Aruba Lions Club ta bin profilando su mes positivamente riba e plataforma internacional pa cu proyectonan cu e tin, entre otro esun di cama di hospital, rolstoel y Smile Mobile.
Tanto asina cu e weekend cu a pasa president di Aruba Lions Club Sr. Ivan Croes a ser nombra como district coordinator di Lions Club Internacional Foundation. Ta un imenso placer y orguyo cu ta nombra un arubiano un biaha mas pa un puesto asina importante den e organisacion asina prestigioso. Den pasado Aruba Lions Club a sa di sobresali cu 3 Gobernador di districto: Lion Oscar Marugg (1964-19650, Lion Elias Fingal (1985-1986) Y Lion Frank H. Croes (1999-2000), kende tambe a fungi como Presidente di Conseho di Gobernadornan durante e periodo di 2000-2001.
Henter e famia di Aruba Lions Club ta felicita Lion Ivan Croes y ta completamente sigur cu e lo sa di cumpli cu su debernan manera ta stipula pa LCIF , cu ta stimula e club nan pa nan contribui na e campaña 100 cu e meta cu LCIF por sigui yuda persona nan den nececidad rond mundo. Riba e foto por aprecia momento cu Past Internacional President Ln Joe Preston ta felicita Ln Ivan Croes.
