Durante e reunion públiko di Parlamento dia 1 di òktober 2020 Minister di Hustisia, sr.Quincy Girigorie, a informá Parlamento ku e la tuma e desishon pa hala e petishon pa e ‘aanschrijving’ aden i asina no pidi Parlamento trata i eventual bai di akuerdo ku un artíkulo so di e Politieregeling 2013 pero pa Parlamento trata henter e Landsverordening konserní.
Segun sr. El Ayoubi e petishon di Minister ta na su lugá mirando ku esaki ta trese ku ne ku no ta únikamente e posishon hurídiko di polis lo wòrdu trata pero tambe e areanan ku ta regla entre otro e tarea, struktura di organisashon, responsabilidat, outoridat i struktura di maneho pa loke ta trata nos kuerpo polisial tambe lo keda atendé i eventualmente ofisialisá den lei ku ta e manera korekto ku Parlamento ta trata ku leinan o sea un lei den su totalidat.
E echo ku den aña 2015 miembronan di kuerpo polisial a keda poné formalmente den nan funshonnan nobo ku forsa retro-aktivo te ku 1 di desèmber 2013,esaki konforme e ‘Convenant Reorganisatie KPC, sin ku nan posishon hurídiko nobo “BRPC 2013” a keda formalisá ainda, tambe ta mustra kon importante ta pa bai di akuerdo ku e Politieregeling 2013 mas lihé posibel.
Sr. El Ayoubi ta kere firmemente ku leinan mester keda atendé i no por ta monta unu riba otro sin ku esakinan keda debidamente trata pa e gobièrnu i o e Parlamento di turno. P’esei sr.El Ayoubi ta satisfecho ku e titular di Hustisia a hasi su esfuerso pa e Politieregeling, ku for di aña 2013 ta den trámite pa keda ofisialisá, keda kla. Mirando ku e trayekto aki ta den rekta final minister a pidi pa por trata esaki e siman entrante.
Sr. El Ayoubi ta sigui bisa ku un di e trabounan importante ku Parlamento mester hasi ta pa trata, debatí i eventual akordá leinan riba diferente area semper ku meta prinsipal pa kontrolá i yuda ehekutá tareanan di gobièrnu ku ta na fabor di tantu trahadónan komo henter nos komunidat. Sr. El Ayoubi ta finalisá bisando ku tantu Parlamento komo gobièrnu mester usa e tempu mas efektivo i e parlamentario ta konta ku den un término di 2 siman e lei konserní lo yega Parlamento pa keda trata i akordá pa asina duna cesar loke ta di cesar.
