“E ultimo dianan aki pueblo por a tuma nota cu tin vandalismo tumando luga riba e netwerk di Setar. Nos no sa kico ta intencion di e persona(nan) aki pero un cos nos ta sigur, e daño cu el a haci na comercio y pais Aruba ta enorme. Nos ta lamenta e tipo di actonan aki y nos ta spera cu pronto e malhechor(nan) aki cay den man di husticia. Alabes Sindicato di Trahadonan den Telecomunicacion (STT) ta pidi pueblo pa ta extra alerta den e dianan aki”, asina Jeromin Kelly, presidente di e sindicato cu ta representa trahadonan di SETAR, a duna di conoce den un relato.
Di otro banda STT ta sumamente orguyoso di coleganan cu a actua rapidamente, cu a tuma e pasonan necesario y traha te laat den oraran di marduga pa reestablece e servicionan bek. No ta facil ora cu bo ta wordo sorprendi pa un acto di vandalismo asina (algo cu nos ningun a biba pensa cu por pasa) pero Aruba semper por conta riba empleadonan di Setar NV cu ta contribui grandemente na e operacion y existencia di Setar NV pa asina por aporta substancialmente na caha di gobierno por medio di dividendo, impuestonan, licencia y mas.
“Loke pa nos ta increibel y inaceptabel pa kere ta cu ora un acto di vandalismo asina tuma lugar, cu nos por hasta categoris’e como un sabotahe, bo ta haya un persona cu por kere cu por saca bentaha di e situacion y purba di hunga populismo. Den e caso aki nos ta referi na Sr. Lincoln Gomez cu ta representante di Digicel. Dicon tempo cu pueblo tabata sufri di e pandemia caminda cu mas di 34 mil conciudadano a perde trabouu, Sr. Gomez no a papia na nomber di Digicel pa asina yuda esunnan cu a perde trabou, pero awor cu un vandalismo a tuma lugar, ta purba di pone nos compania nacional den un spotlight negativo? Nos di sindicato STT ta categorisa esaki como oportunista”, segun Jeromin Kelly.
E sindicalista a corda henter pueblo cu ta empleadonan di Setar NV tabata solidario cu pueblo, caminda nan a contribui cu mas cu 5 miyon na e fondo di FASE. SETAR NV ta emplea directo mas di 400 empleado y contratista, dus nos por bisa cu miles di hende ta biba directo y indirecto di e compania nacional. Banda di emplea mas di 400 empleado, SETAR NV a contribui grandemente na e caha di pais Aruba: 180 miyon na dividendo, 85 miyon na winstbelasting, 130 miyon na licencia y ta yuda grandemente na diferente instancia cultural, enseñansa y deporte por medio di donacion.
“Setar NV ta patrimonio di pueblo caminda e placa ta wordo inverti bek den e pueblo y no ta bay pa accionistanan pafo di Aruba. Setar NV semper t’ey pa yuda den tempo bon y tempo malo pasobra Setar NV ta di pueblo, den un solo palabra Setar ta di bo tambe”, asina Jeromin Kelly a finalisa bisando.
