Nos ta recorda den feliz memoria K9 polis Jack cu recientemente a fayece. Jack a nace dia 22 September 2011 na Europa. E tabata un cacho cu a captura mirada di colega Coffie di unidad canino. Polis Coffie tabata en busca di cacho nobo pa unidad canino y aki ta caminda cu Jack e cacho cu menos tabata di spera di dje a resulta un di e K9 polis cu mas a resalta den su funcion policial.
Na momento cu Jack a bin Aruba ela pasa su trayectoria di training y examen exitosamente na Aruba. E ta e prome K9 polis netamente Arubiano.
Jack tabata asina activo y bon den su funcion cu mayoria droga of armanan di candela tabata haya dor di dje. Mas o menos 65 arma di candela, 3 pa 4 handgranaat y droga ta riba mas o menos 13 mil kilo e la haya durante su carera como K9 polis.
Pa mas o menos 8 pa 9 aña Jack a sirbi su pais Aruba bou di guia di polis Coffie como su “hondengeleider”.
“No tabatin marduga ni mainta, no tabatin dia ni anochi manera cu ela tende e patruya cende, e tabata cla caba pa subi den e patruya y bay den acción” tabata palabranan di colega Coffie cu a biba cada momento cu Jack. Pa Coffie, Jack no ta simplemente un colega pero el a bira su miho amigo di cas y asta a forma parti di su famia. Un bond fuerte el a crea entre un cacho y un hende.
Pa polis Coffie, traha cu cacho ta un pasion, e no ta djis simplemente un trabou. Bo mester tin e gana y animo pa tur dia sigui dilanti hunto cu bo K9 band’i bo.
Pa Cuerpo Policial Aruba ta un honor y nos tin un aprecio grandi cu cada cacho ta nos colega. Cada cacho cu ta forma parti di K9 unit ta nos colega den blauw. Cu e despedida di K9 polis Jack lo trece un bashi enorme pa nos Cuerpo. Pero nos ta gradicie pa tur e trabou cu el a haci pa kita tanto arma di candela y droga for di nos pais. Cu K9 polis Jack sosega na paz.
