Den e dianan aki a observa cu oposicion ta trece dilanti cu gobierno a subi gasto di servicio y producto cu 43 miyon florin. E informacion aki no ta acuerdo. Oposicion ta referi na un observacion di CAFT den nan conseho riba presupuesto 2022 riba pagina 3. Den e observacion aki CAFT no ta bisa cu gobierno a hisa gasto cu 43 miyon florin.
Locual CAFT a pidi ta pa gobierno cambia e cifra presupuesta y pa pon’e na e nivel di e gastonan realisa den aña 2020. Na ningun momento CAFT ta bisa cu gobierno a subi gasto cu 43 miyon florin. De facto den e grafico adhunto por wak cu e gastonan di servicio y producto a subi cu solamente 14,6 miyon florin den e situacion di e pandemia.
Gobierno a adresa e conseho aki di CAFT y a splica cu tecnicamente no por haci e cambio aki ya cu aña 2020 no tabata un aña cu Gobierno por a opera normal debi na, entre otro, e shelter in place. Esaki a pone cu gastonan presupuesta no a realisa. Den aña 2020, e ‘uitputtingspercentage’ di servicio y producto tabata na 85% y den aña 2021 esaki tabata na 90% indicando cu gobierno su operacion a keda atras y e gastonan no a realisa conforme locual a presupuesta. Cambia e cifra manera CAFT ta conseha, awor cu gobierno su operacion ta bay mas y mas na normalidad, lo trece e problema cu lo por surpasa locual a presupuesta.
P’esey semper ta bon pa ora ta trata e materia complica di finansa publico, pa puntra informacion en bes di sali critica sin compronde locual ta den consehonan di CAFT.
