No tin palabra pa describi loke cu Jonathan Thiel, conoci como Jeon a haci y ta haciendo pa su pais y loke mas a resalta ta, cu artistanan di taya mundial a acerk’e caba cu hopi animo pa e por traha cu nan. Sea como productor of como cantante. Esaki ta loke a pasa den e caso di Nicky Jam y Gloria Trevi. Aruba completo por a mira e exito grandi, cu a ricibi un disco di Platino, mirando e calidad y grandura di e exito. 80 million views riba Youtube ta algo sumamente grandi, pa nos artista internacional, kende a wordo ricibi cu tur honor mereci na aeropuerto ayera, na momento cu el a yega Aruba.

Diamars, ministernan Xiomara Ruiz-Maduro y Dangui Oduber, hunto cu su famia y amistadnan di mas cerca, a ricibi’e den e VIP Room di Aeropuerto, unda cu el a ricibi palabranan di elogio

Minister di Turismo, Dangui Oduber, den su discurso, a splica cu pa reconoce un yiu di tera, yam’e na su nomber, ta kippevel bo ta haya na e momentonan ey. E minister a gradici Jeon pa tur loke e ta haciendo pa nos pais. Como minister di turismo, e promocion cu e ta haciendo pa Aruba, ta impagabel. Tur entrevista cu e haci ta menciona Aruba su nomber, ta un propaganda impagabel. Awo e carera di Jeon a cuminsa y gobierno di Aruba ta desea Jeon tur clase di exito y semper hiba Aruba den su curason.

 

Gradicido na su isla

Di parti di Jeon, na momento di su yegada, el a comenta cu e ta hopi gradicido na su isla pa no solamente loke el a logra awor aki, pa e isla, pero pa tur e temponan cu nan a sosten’e, di tempo di Gaiton y tambe pa tur e cancionnan cu el a saca na Papiamento. E ta hopi gradicido pasobra sin apoyo di Aruba, Boneiro y Corsou, esaki no tabata posibel tampoco. Dimes cu ora cu esaki a sosode, a bay wak ken e ta y nan a haya sa na e islanan ken e ta y kico e ta haci. E ta hopi gradicido na Aruba, Boneiro y Corsou y vooral na Aruba, pa a ricibi’e na e manera eynan. Pe mes loke el a pasa aden ta mucho formal pa un Muchi’i Mondi. El a siña balora e cosnan di mas chikito. E ricibimento na aeropuerto pa Jeon ta di hopi balor. Awe, diaranson, lo bay tin hopi balor p’e, aunke e ta chikito. Esaki lo keda den su curason pa semper, door cu e ta bin for di un isla chikito y humilde. Humildad ta habri porta pa exito.

Jeon ta sigui comenta cu e lo bay tin un exito riba su nomber. Despues di Machika, J Balvin, aparte di ta un artista ta un bon ser humano. Ta un persona cu el a bira bon amigo di dje, y esaki ta prome cu nan a traha muziek. Semper el a keda cu un “love” pa Jeon, manera ruman. E ta keda push’e y ta gab’e tur caminda backstage, cu tur e artistanan. Pesey tur e artistanan ta bin cerca dje, y ta puntr’e ki dia por traha muziek of haci algo. E ta straño, pasobra Jeon ta un fenomeno nobo mirando cu e ta un “Much’i Mondi”. E ta straño pa e otronan, mirando cu e ta toca, cuarta, tambora, wals, tumba, y esey ta straño pa nan. Tur hende ta haya e cosnan ey interesante.

 

Artista independiente

E noticia di mas great cu Aruba por haya cu Jeon ta un artista independiente. A haci un deal solamente pa Machika. Esaki ta un logro grandi, pa ta te eynan, como independiente, ta casi imposibel. Ta algo cu a pasa pa prome biaha na mundo. E ta sinti hopi bon pa djis ta di Aruba y ta haci muziek y ningun hende no tin nada di bis’e con pa haci su muziek.

Jeon ta produciendo e cantica nobo di Gloria Trevi, manera ya menciona caba. E lo tin cu bula bay bek Merca pa haci grabacion. E ta trahando cu artistanan basta grandi y veterano cu ta legendario, manera Gloria Trevi mes. E ta haciendo yen di otro proyecto grandi cu lo bay habri porta y caminda. Mas importante ta humildad. Backstage, manera cu minister Oduber a experencia, tur hende ta stim’e backstage, pa ken e ta. Pa ta su mes y pa ta humilde. Ta pa hend’i mondi cu no ta worry cu nada. Tur hende ta gust’e pa ta su mes.

 

Conseho pa hobennan di curason

Tempo e tabata chikito, semper den klas juffrouw ta puntra, pa skirbi riba un papel, kico ta algo cu lo bo haci pa bo isla. Esey ta algo cu a keda den su cabes. Pa un motibo e ta existi, el a splica y pa un motibo e tin talento. Pero kico ta bay haci cun’e. Ta bay desaroya, of ta bay  haci algo pa su isla. Hopi biaha nos ta cla pa critica, pero no ta pensa un rato, kico ami por haci pa por logra. Kico mi por haci pa mi isla. Tur hoben tin cu siña mas di e parti spiritual. Awendia mayornan por ta no ta siña muchanan resa mas. No ta siña nan medita mas. No ta siñanan nada di e cosnan ey. Y otro hende ta siñanan cosnan robes. E cosnan a cuminsa cu nos mester siña e muchanan e parti spiritual. Ban concentra riba e parti spiritual. No ta bay bisa cu e parti spiritual ta asina aki, pero Jeon ta un hende cu ta resa hopi y papa Dios a pon’e eynan. Su conseho pa tur hoben ta, pa cuminsa kere den su mes y cuminsa kere den Dios. Haci hopi oracion y si bo tin un talento, desaroy’e y purba haci algo pa bo isla. No ta importa ken bo ta. Si bo ta un chapido, sea e miho chapido.

 

Homenahe

Awe nochi lo bay tin un homenahe na e gran artista aki, cual ta pa 7’or dilanti di Bestuurskantoor. Henter e pueblo di Aruba ta keda cordialmente invita pa asina rindi e homenahe mereci na Jeon, kende a pone Aruba halto riba e tarima internacional.