Awe e representante di Aruba na e certamen internacional ‘Reina Hispanoamericana 2021’, esta Jeanique de Palm, di 28 aña di edad, a sali rumbo pa Bolivia pa ey representa Aruba den e certamen di beyesa.
Despues cu na Januari di e aña aki, Comishon Reina Hispanoamericana Aruba, bou direccion di Endy Croes a apunta Jeanique como Aruba su representante, mesora a cuminsa e trabounan di preparacion. Jeanique a cuminsa move mesora pa e por a biaha. Un preparacion extenso bou guia di diferente profesional na Aruba a concentra riba Public Speaking, Personal Branding, Pasarela, Les di Makeup y Cabey y training fisico. Awe Jeanique ta sinti su mes hopi sigur di e trabou cu e lo bay desplega na Bolivia.
E certamen cu e aña aki ta celebrando nan di 30 edicion, ta conta cu 33 candidata for di diferente parti di mundo. Den e programa di e certamen a inclui bishita na 4 ciudad di Bolivia, unda cu e candidatanan lo biaha den Bolivia mes pa atende diferente actividad publico y comercial. E anochi final lo ta dia 30 di October 2021 pa 10:00 pm.
Nos ta desea Jeanique hopi exito y lo sigui su pasonan di cerca!
