Nos ke pone na atenshon di tur Nashon Karibense pa ta konsiente di e situashon aktual ku ta okuriendo riba nos islanan ruman, Aruba, Korsou I Sint Maarten. E gobierno Hulandes ta malusando e krisis di COVID-19 pa impone un kambio konstitushonal ku ta inaseptabel I inhustu.
Hulanda nunka a laga los di su plan I trajekto pa rekonkista e islanan di Karibe Hulandes ku e meta pa mas alew rekupera poder I influensia geo-politiko I mantene I tene na bista nan plan-pa-gera kontra Venezuela I su reservanan-di-petroli. Hulanda ta probechando lo maximo di e embargo ekonomiko riba Venezuela usando esaki kontra nos islanan pa destrui nos ekonomianan, destabilisa nos gobiernonan, I kontinua pa stap pa stap rekonkista I re-kolonisashon. Korsou ta bao di preshon di gobierno Hulandes I a wordu aisla I hinka den huki pasobra e refeneria ku ta e dunado di trabao prinsipal di Korsou ta den tapara pa wordu sera.
Tempu ku Shell di Hulanda a bandona I laga Korsou den un desaster ekonomiko na 1985 I tambe Hulanda a sera Offshore ku tambe
tabata otro pila mayo di ekonomia e tempu ey, e mesun PDVSA di Venezuela a reskata Korsou I a tuma e refineria over I opere for di e tempu ey I a stabilisa ekonomia I demokrasia di Korsou. Ku e resiente menasanan di gera kontra Venezuela e gobierno Hulandes a bolbe bek aden, usando e embargo kontra Venezuela I forsa PDVSA pa bandona, atrobe kreando otro kaos ekonomiko. E mesun kos ta e kaso na Bonaire, ku terminal-pa- almenasa petroli BOPEC ta bao di embargo I ku ta propiedat ekslusivo di PDVSA, tambe a wordu ordena pa
wordu sera. Tur esaki lo kondusi na mas dependensia di Hulanda.
Asina ku e krisis di COVID-19 a eskala, e gobierno Hulandes lidera pa Sekretario-di-estado Knops, un ex- militar-taktiko usa den e gera di Irak pa su ekspertiso pa operashonan pa sigura I guardia energia I petroli, a fortalese su gara riba e islanan Korsou, Aruba I St Maarten dor impone kondishonan riba e yudansa/fiansa finansiero ku lo forsan pa efektivamente entrega nan outonomia limita I podernan bek na gobierno di Hulanda. Un di e kondishonan ku ta korta den salario di tur empleadonan di gobierno ku lo redusi nan forsa di kompra mas I redusi aktividat ekonomiko ku ya kaba ta den krisis dor di Korona I ku tambe a stop e industria I ekonomia di turismo.
Na Korsou, ku un gobierno pro-Hulanda, esaki a kondusi na protestanan ku riba 24 Juni a eskala den disturbionan I insendionan. Komo reakshon e gobierno Hulandes a manda sentenares di militar pa wordu usa kontra e pueblo di Korsou I posiblemente den un proksimo paso den un konflikto arma kontra Venezuela. Na St Maarten e sekretario di estado Knops a usa e mesun taktikanan militar Hulandes di ekstorshon pa forsa nan tambe pa firma I entrega outonomia I podernan bek na e gobierno Hulandes, tur den nomber di ayudo/fiansa
pa COVID-19
Na Aruba, e gobierno ku a mantene firme kontra e intervenshon agresivo Hulandes a wordu pone lomba kontra muraya I ta bao di menasa, ayera 6 di Juli, ora ku nan risibi for di Den Haag un dokumento konteniendo 218 pagina ku 18 medidanan dikta pa e Hulandesnan pa bini na vigor i ku lo impone un institushon no-demokratiko di supervishon- finansiero ku lo para riba nan mes gobierno I demokrasia, I ku lo elemina nan outonomia. E medidanan aki lo mester ta vigor prome ku fin di siman aki si no Hulanda lo suspende stop tur ayuda/fiansa
finansiero mesora si no kumpli.
Mientrastanto ku na Sint Eustatius e mesun Sekretario di estado Knops a destitui e gobierno, I no tin un gobierno demokratiko ya kaba pa tres anja, I un gobernado apunta pa Hulanda ta gobernando I no tin perspektiva ki tempu lo tin elekshon pa restora demokrasia.
Na Bonaire, ku ya kaba a wordu ilegalmente aneksa I ta bao di dominio I gobernashon Hulandes desde 10-10-10, e gobierno Hulandes a posee di tur entrada di impuesto di suidadanonan Boneriano I e gobierno lokal no tin akseso na sennan di belasting di e pueblo I no por disidi riba nan ni por pidi o hanja kuenta I responsabilidat riba esaki di gobierno Hulandes. E mesun gobierno Hulandes aki awor ta usa e krisis di COVID-19, invertiendo hopi sen den RCN su Public Relations pa promove propaganda-falsu ku Hulanda ta yudando Bonaire I promove esaki riba e otro islanan Korsou ku Aruba pa destabilisa nan gobiernonan I dividi nan pueblo, ku si nan ta bao di dominio I gobierno Hulandes, nan lo risibi yudansa pa COVID-19 sin kondishon meskos ku Bonaire.
Nos ta hasi un yamada riba tur nashon Karibense pa kondena I yuda nos para e agreshon Hulandes kontra nos pueblonan Karibense, pasobra si e Hulandesnan logra nan meta, Karibe nunka mas lo por ta un zona di paz. E re-kolonisashon di Karibe I Amerikas lo wordu pone den marcha I e destabilisashon I divishon lo plama over di henter Karibe I Americas, pasobra e Hulandesnan-Oropeo lo ta presente den tur plataformanan di Karibe I Amerika Latino I lo kontinua ku nan plan. Dikon e asuntu aki ta di suma importansia pa Karibe kompleto, ta
pasobra Aruba, Korsou I Bonaire (islanan ABC) ta menos ku 15 miya for di kosta Venezolano I lo wordu usa ora ku e gera-ekonomiko di Merka kontra Venezuela sostene pa Hulanda desaroya bira un konflikto arma ku lo destabilisa henter region I pas den Karibe.
