Inspectie Volksgezondeid Aruba (IVA) ta anuncia cu lo cuminsa cu bishita/inspeccion na tur casnan di cuido na Aruba entre 19 di februari y 1 di maart 2018.
E prome rond di bishita lo ta pa cera conoci cu e organisacionnan, nan empleadonan y nan manera di traha. Como organo independiente IVA ta carga e responsabilidad pa monitor e calidad di cuido na Aruba. Parti di esey ta pa controla si Casnan di Cuido ta cumpli cu e reglanan den e Ordenansa Nacional Cas di Cuido (Landsverordening Verzorgingshuizen) cu a drenta na vigor dia 1 di augustus 2016.
E ordenansa aki ta stipula cu tur cas di cuido mester ta registra na Departamento di Salud Publico (DESPA) y cu tur mester a entrega cierto documentonan manera un plan di maneho, declaracionan di Salud di tur empleado y mester a pasa control di diferente instancia gubernamental manera Brandweer, DTI y Dienst Warenkeuring en Hygiëne. E prome rond di bishita lo duna IVA un bon bista di e situacion actual di e casnan di cuido na Aruba y ta
un oportunidad pa duna conseho pa mehoracion. E Ordenansa Nacional Cas di Cuido por haya pa download riba IVA su website riba www.iva.aw
