“Contrario na e percepcion cu lo por tin di publico, Island Finance no tin ningun relacion cu e señora y tampoco ta haci negoshi of tin relacion di cliente cu e bufete di abogadonan Croes, Wever & Ruiz”, asina un comunicado di prensa emiti pa Island Finance ta bisa. Esaki tin di haber cu e incidente di ayera durante e conferencia di prensa di Jan de Ruijter. E banco di prestamo a hay’e ta atende cu critica den comunidad pa un hecho cu simplemente NO ta berdad!
Island Finance ta un banco di prestamo estableci pa 40 aña caba na Aruba, na 5 diferente localidad. Nan ta situa tambe na Corsou, Boneiro, St. Maarten, Panama, Trinidad, Puerto Rico y mas isla den Caribe. E compania Caribbean Financial ta doño di e banco di prestamo, cu ta bou supervision di Banco Central pa garantisa cu ta cumpli cu regulacionnan di privacidad estricto di nan clientenan.
“E bufete di abogado a menciona nomber di nos compania sin nos autorisacion. Mas ainda, nos no por confirma ni desmenti si cualkier persona tin of tabatin un cuenta cu nos, pasobra nos ta trata nos clientenan y nos fiansanan den forma discreto”, asina Island Finance a subraya.
