Despues di basta tempo hospital, of Stichting Ziekenverpleging Aruba, tin un Hunta di Directiva completo pa un termino largo. Tabatin varios cambio den e Hunta di Directiva. Na varios momento tabata tin un miembro so. Pero den statuut ta bisa cu mester tin dos miembro, esta un voorzitter y un lid, kende ta Gregory Croeze, kende ta miembro for di dia 1 di april 2020. E voorzitter di Raad van Bestuur ta den persona di Jacco Vroegop, kende alabes ta Director Medico di Hospital.
Vroegop tin casi dos luna cu e hospital. A cuminsa den un temporada basta fastioso den 2020. Tabata tin diferente calamidad, entre otro hackmento di e sistema, cual a tuma luga un aña pasa. Esaki a causa disturbio den hospital. A perde hopi informacion y ainda nan no a recupera. Ta trahando riba esey. E ultimo añanan tabata tin tekortnan hopi grandi financiero pa diferente motibo, segun Croeze.
Awor aki ta wak con pa sanea hospital, pa nan por ta un Stichting hopi mas sano. E aña aki tambe tabata tin COVID na maart cu no a yuda. Na juni tabata tin candela, cu a causa panico den cas, cu a rekeri varios cambio. Tin e construccion cu tin varios aña andando, cu tin retraso caba pa mas di 2 aña y cu lo costa pueblo hopi placa, door di retraso cu ta purba di soluciona hunto cu pais Aruba y SOGA. Ta spera e boluntad di tur partido pa por keda cla cu e construccion.
Awor aki cu COVID a cuminsa baha bek, Raad van Bestuur tin cu cuminsa traha riba nan meerjarenplan. Nan mision, vision y strategianan pa e proximo añanan. Aki lo envolve tur trahado, kluster, zorgmanager como tambe sindicato, unda cu lo bay bin cu vision unda cu kier bay traha cu ne den e proximo añanan.
Potencial den hospital
Jacco Vroegop, voorzitter di Raad van Bestuur y director medico, ta hopi contento di ta riba e isla y ta mira e potencial cu tin den hospital, mirando su impresion den e sector.
E intencion ta pa haci e hospital ta uno top den e region di Caribe. Tin varios cambio cu a tuma luga, cual segun Vroegop tabata hopi importante pa traha riba dje y tabata necesario.
Por compara hospital cu un barco cu tin buraco, y kier cera e buraconan aki, manteniendo tur hende abordo.
Vroegop a splica cu nan a tende of tin hende a menciona e palabra reorganisacion, pero nan mes no a bisa esey. Si e ta bisa cu nan kier traha cu tur stakeholder pa por drecha e sistema di hospital y esey ta logra solamente door di bon dialogo.
Tur loke nan kier haci ta pa logra un hospital sano tanto organisatorio como financieramente, contrario na loke cu sindicato ABV a indica durante nan conferencia di prensa, unda cu nan a indica cu nan ta retirando varios persona y riba e manera cu esaki ta sosode. “Mi kier logra cu e hospital tin un bon operacion, cu ayudo di tur esnan envolvi, y cu e ta financieramente saludabel.”
No ta reorganisa sino bin cu cambio lagando ningun hende afo
Vroeghop a splica tambe cu nan no tin e palabra reorganisacion den nan vocabulario, pero si nan mester di cambio pa asina sanea hospital.
Pa awor aki nan tin hende di menos y nan a pone un cantidad di vacatura. E vacaturanan tey ta hustamente pasobra hospital tin mester di hende pa asina ofrece un miho calidad di cuido na e habitantenan di Aruba.
Mester di varios hende, manera den e departamento di dialyse, departamento di rutgen, OK, tambe nan mester di specialista pasobra algun ta bay.
Mas curso
Un di e metanan ta pa percura pa tin mas curso. Kier percura pa tin mas hende den cas cu ta mas opgeleid y por crece, en particular pa e localnan.
No ta duradero pa busca hendenan di afo, segun Vroeghop. Ta desea pa e hendenan na Aruba mes, e localnan haya e interes pa drenta den e sector di cuido y por haya un trabao den e sector.
Den e crucial aki temponan aki, cuido ta un factor cu ta sumamente importante, caminda cu por haya trabao aden. Ta spera di por lanta algun hende fo’i soño, pa asina nan por drenta den e sector di cuido. Esey ta loke cu kier lucha p’e, segun Vroeghop.
Ta bon pa sa cu den e ultimo dianan, a papia bon cu e sindicato. Nan ta na altura di loke bestuur ta bezig cu ne y di nan plannan. Ta pa e motibo ey mes nan ta sorprendi di nan expresionnan. Por ta ta trata aki di un mal comprondemento of mal comunicacion, cual Vroeghop a splica cu kier traha riba dje.
