E locual a resta di e sistema di tempo Isaac, ta contene biento di 55km pa ora, cu algun rafaga. Awe 5:00am a bah’e di Tormenta Tropical pa un Ola Tropical, cu ta contene algun rafaga di biento y ocasionalmente basta awasero segun e ta moviendo den Caribe den e siguiente dianan. E ta un sistema hopi desorganisa.
Asina mes, e islanan den su pasada mester tene cuenta cu lama mas bruto cu normal na e parti Oost y Noord-Oost. Algun awasero local cu por bin compaña pa strena cu lamper specialmente e weekend aki.
Pa loke ta trata Aruba mes, e lama cu a subi tera un poco na Baby Beach, ta algo normal. Di acuerdo cu Meteorologo Drs. Marck Oduber, dor di “vloed” halto compaña pa poco biento for di direccion zuid-oost, ta crea e situacion aki.
Ta bon pa alerta comunidad si cu e chens pa poco awasero local lo keda vigente, dor di hopi humedad y instabilidad cu a keda atras. Ta pronostica cu pa diadomingo anochi pa dialuna mainta e biento lo cuminsa supla normal atrobe, for di e direccion di custumber y haciendo menos calor manera e ultimo dianan aki.