Mas o menos 2.30 di merdia Fiscal mr. Pronk y demas autoridadnan a yega na oficina politico di Benny Sevinger, na skina di Weststraat, pa tira un inval. Esaki den cuadro di e investigacion Avestruz, unda cu den oranan di mainta a tira inval na cas di: Benny Sevinger, Gaby Werleman y Leoncita Arends, pero tambe na oficina di Fast Delivery.
For di mainta a pidi e señora encarga pa habri e oficina aki pa ora autoridadnan yega y cumpli cu un entrada hudicial.
E wardamento a tarda hopi ya cu for di 7.30 cu a habri e oficina, te 2.30 autoridadnan a yega den compania di funcionarionan di Cuerpo Policial pa drenta paden. Manera por corda, e edificio aki a wordo uza door di e candidato di AVP, awo Parlamentario, durante campaña. Pero despues di e temporada aki no a uza e espacio mas. Pues, segun por a compronde, e luga ta practicamente bandona pa dos aña caba y no tin coriente tampoco. Pues den un scuridad nan mester a sinta coba loke por tin ainda cu ta di interes pa investigacion Avestruz.
Na momento cu autoridadnan tabata na e sitio, tabatin diferente simpatisante di e politico cu a yega na e sitio.
