Fundashon Desaroyo Deportivo Kòrsou – FDDK a nombrá un direktor nobo den persona di sr. Vergilly Winklar pa sigui e vishon i mishon di e fundashon riba tereno di deporte. FDDK su vishon ta pa stimulá i praktiká e konsiensia deportivo na Korsou tantu aktivo i pasivo, hasiendo aktividatnan deportivo aksesibel pa tur hende i dunando guia profeshonal na deportista i siudadanonan.
Su mishon ta pa inspirá i determiná pa empoderá e ser humano pa promové trabou den ekipo, den e búskeda kontinuo pa ekselensia uzando deporte komo medio. FDDK ta é punto sentral pa tur asuntu relatá ku deporte kuminsando di organisashonnan riba tereno di deporte te inisiativanan deportivo di siudadanonan. FDDK ta ofresé sosten di un forma strukturá i transparente na organisashonnan di deporte, skolnan i siudadanonan ku ta hasi deporte en general. E ophetivo ta pa subi deporte na skol, deporte rekreativo i kompetetitivo na nivelnan mas haltu pa medio di un ròl di fasilitadó.
Un komunidat ku ta move i ta hasi deporte ta importante i FDDK ta duna su kontribushon na realisashon di e ophetivo ei. FDDK ta duna sosten na tur. Sr. Winklar a kuminsá inventarisá tur e prioridatnan ku tin pendiente riba e tereno di deporte pa por yega na un plan di ehekushon!
Riba djamars 1 di òktober sr. Winklar a pasa serka Minister di Deporte sra. Marilyn Alcalá-Wallé pa sera konosí i Minister a felisitá sr. Winklar i yam’é bonbiní den presensia di direktora di e sektor di Kultura i Deporte sra. Lizette Sambo-Velder.
