Tur studiante di scol of otro ciudadanonan cu kier, por participa den e evento di atletismo organisa door di IBISA proximamente.
Ta trata di e Aquathlon Escolar, unda por registra online tambe, cuminsando for di diahuebs, 7 di november. Will Erasmus, chef di Desaroyo di Deporte di IBISA den un conferencia a splica con esaki por wordo haci. Tanto studiante- como docentenan por inscribi pa participa na e evento aki.
E careda mes ta tuma luga dia 7 di december, riba cual dia e check in ta cuminsa pa 6’or di mainta y e careda mes ta cuminsa pa exactamente 7’or di mainta. Manera tur aña, e careda ta tuma luga na Nikki Beach, Linear Park. Pa tin suficiente tempo pa procesa tur informacion, e registracion online ta cera dia 4 di december, pa 4’or di atardi.
E categorianan den cual por inscribi ta: Categoria A ta core 500 meter; landa 50 meter y core 500 meter; Categoria B y C lo core 1 KM, landa 100 meter, y despues bolbe core 1 kilometer; Categoria D, E y F lo core 1.5 KM, landa 200 meter y core 1.5 km bek.
Ta importante cu participantenan den relay Team mester ta di e mesun scol. E por ta combinacion di mucha muhe y mucha homber.
Riba e pagina riba internet ta haya mas informacion di e competencia. Djis subi riba e pagina di IBISA.
