Danki na e oido y sosten di Minister di Cultura, sra Xiomara Ruiz-Maduro y di TPEF (Tourism Product Enhancement Fund) cu por a habri e porta di Museo Arqueologico Nacional Aruba (MANA) completamente atrobe pa henter pueblo di Aruba y nos bishitantenan di exterior.
Diamars 5 di november cu un acto simbolico Su Excelencia Gobernador di Aruba hunto cu Minister di Cultura a efectua reapertura di exposicion permanente di (MANA). Specialmente pa e reapertura a traha un bebida inspira riba nos ante pasadonan indígena: “Daçato” (Dasato).
E ta un bebida alcoholico traha cu e dadro di Aruba. E nomber “Daçato” ta un combinacion di e palabranan Caquetio “Dato” pa e dadro y “Maçato” pa un bebida alcoholico. Esaki a ser usa den e ceremonia simbolico. Un danki ta bay specialmente pa Jhon Freddy T. Montoya y Fatme Rigaud cu a percura pa a crea un obra p’ e acto simbolico
Desde diarason dia 6 di November MANA su salanan di exposicion permanente ta habri bek pa un y tur por disfruta.
Orario pa publico ta dialuna di 1 or di merdia pa 5 or di atardi y di diamars te diabierna entre 10’or di mainta pa 5 or di atardi. Pa scolnan por habri mas trempan segun cita. Sigui nos riba nos paginan di Facebook Archeo Aruba y National Archaeological Museum Aruba pa mas informacion.
