Frakshon di PAR a entregá e proyekto di lei kontra intimidashon seksual na boka di Trabou na Sociaal Economische Raad Korsou (SER).
Seguridat na trabou ta un parti esensial den bon funshonamentu di sektor laboral. Awor mas ku nunka ta importante pa krea espasionan laboral sigur.
E keho nan pa ku intimidashon i intimidashon seksual na boka di trabou ta subiendo di forma drástiko. Esaki ta keda demostrá den e investigashon di sra. Karin Bosman di ‘About Workplace Harassment’ i tambe Optima Curacao BV. Sektor di kuido, trabounan públiko i empresarial ta sektornan kaminda tin sifranan haltu di intimidashon seksual.
Ainda e víktima no tin un kuadro hurídiko spesífiko pa tene na dje. Ademas falta hopi konsientisashon den tur sektor tokante e tema aki. Den kuadro di esaki frakshon di PAR a traha un lei di inisiativa i a entregá esaki.
Frakshon di PAR huntu ku diferente eksperto entre otro sra. Bosman (AWH) i sra. Geraldine Archer (CAFRA) a traha riba e lei aki i hasi e adaptashonnan nesesario. Awor e lei ta haña e delaster konseho di SER pa asina ofisialmente por wòrdu trata den Parlamento.
Segun investigashon resien 25.000 hende hòmber i hende muhé di Kòrsou ta wòrdu hostigá físikamente, verbalmente i ku akshon na trabou. Esaki ta 33% di nos forsa laboral ku ta wòrdu intimidá na boka di trabou. Frakshon di PAR ta kontentu ku por kontribuí na bienestar di e trahadó i tambe di e doño di trabou dor di formulá inisiativa nan di lei ku en bèrdat por trese un desaroyo positivo pa e sektor laboral i pueblo di Kòrsou.
