Diaranson a sali for di Aeropuerto Reina Beatrix e ultimo vuelo pa hiba pasaheronan Ingles riba nos isla, bek pa Reino Uni. Na edificio di salidanan di internacional, e ekipo di 24ora a conversa cu varios y tur a expresa di no kier bay bek, pero kier keda Aruba.
Nos dushi clima sigur ta hunga un factor importante. “E clima ayanan ta absolutamente miserabel,” un a bisa. Ora a puntra kico ta speranan na cas, a contesta: “Friu, sneuw y miseria. Tur cos ta cera, te hasta ‘pubnan’ lo ta cera.”
Nan a gaba Aruba enormemente, algun di nan bishitando pa prome biaha y splicando cu nan a hustamente escoge pa bin nos isla pasobra ora di bay bek, nan no mester bay den cuarentena. “Mi ta bay bin bek. Aki ta hopi trankil.” Varios a menciona tambe cu nan a keda pa dos siman of mas, disfrutando di Pasco y Aña Nobo riba nos isla.
“Absolutamente mi a encanta. Hasta la vista Aruba,” el a bisa bayendo cu su maletanan aden pa check in.
E proximo vuelo for di Inglaterra ta depende di ki dia e pais europeo kita su lockdown.
