Un conoci di husticia, un persona den noticia negativo cada rato y awo poniendo na peliger e bida di su criatura recien naci.
No ta mucho dia pasa cu a informa di e situacion delicado di un criatura cu a nace prematuro y cu e mama mester a biaha pa Colombia pa tratamento medico pa cu nacemento di e criatura.
Tambe a tuma nota di mensahe menasante for di Colombia di parti Indira Varis dirigi na AZV como tambe un persona cu segun e, lo tin relacion cu su pareha of conoci di dje.
Awe durante ora di mainta, aproximadamente 11:45 am, a pidi presencia di polis na oficina di AZV, pa un situacion bayendo for di man cu e mes un persona aki, esta Indira Varis.
Na sitio tambe tabatin presente un unidad di ambulance cu mester a trata e criatura prematuro aki y transport’e inmediatamente pa hospital mirando su situacion delicado.
Como cu no tabata suficiente, un rato despues den careda di 1:30 pm ta pidi presencia di polis un biaha mas pa Varis, e biaha aki na Caya Fransebloem na Jaburibari, caminda el a causa destruccion y menasa den direccion di e bisiña.
Segun informacion ricibi, instancia lo a cay aden pa asina sali na bienestar y vanguardia di e criatura mirando cu Varis no ta apto pa tin e criatura bou su encargo.
A haya tambe di tende cu Indira Varis lo ta furioso cu e tata di e criatura pasobra e tin intencion di kita e criatura for di dje. Relaciona cu e situacion aki, a surgi un discucion formal na Aliviostraat Playa den careda di 11:00 pm ayera nochi. Por a compronde cu e tata lo a cuminsa su caminda na voogdijraad pa asina cuminsa cu e tramite legal.
Esaki y algun factor adicional ta locual cu tin e persona aki na e momento aki causando problema serio p’e mes pero mas cu tur otro pa su criatura cu ta den situacion hopi delicado y no por ta di un banda pa otro na e momentonan aki, mientras su mama ta agrediendo y/o lantando cu hende.
Na momento cu polis a presenta na Caya Fransebloem, Varis a bandona sitio caba.
