Ya tin mas cu tres siman cu e incinerator riba Dump no ta den servicio. E incinerator ta algo practicamente indespensabel. Ta un maquinaria cu diariamente mester ta den funcion pa diferente motibo. E sushi cu ta sali como lodo na e plantanan di RWZI ta pasa den e proceso di incinerator. Tambe bestia morto ta ser kima cu e incinerator. E cos mas serio ta e sushi medico di hospital.
Tur esey awor aki ta wordo acumula unda e machine di Boldin & Lawson tabata na Dump. Minister Ursel Arends ta na altura di e problema. El a confirma cu ta algun siman caba. Loke ta e bestia morto tin un crematorio segun e mandatario. Esun di sushi medico si no tin ainda un solucion y cada dia e cantidad ta birando mas y mas bou di e dak di e deposito riba e tereno di Dump. Ta mira diferente tipo di bestia ta moviendo rond di e sushi di hospital. E incinerator ta di pais Aruba y bou maneho di DOW.
Un compania priva mester atende cu e incinerator. Ya caba a manda busca e pieza y awo ta wardando riba dje pa pone e incinerator bek den funcion. Ora tin droga confisca tambe autoridad ta hiba esaki eynan ta ser kima. Spera cu pronto e ekipo ta bek den funcion pa asina evita un situacion mas peligroso cu tur e sushi medico cu tin actualmente riba Dump.
