Linda Veronica Wolff a nace riba un 9 di mei 1955 na Aruba. Den e mundo artistico e tabata conoci simplemente como Linda Wolff, miho conoci como “Choling of Ling”.
Na un edad hopi jong, Linda a descubri su amor y talento pa canto. No a dura mucho cu el a afilia su mes na Coro Santa Anna y asina a cuminsa dedica su mes na canto formando parti di e bunita coro aki di Misa Sta. Anna na Noord.
Na aña 1979, Jossy Brokke Jr. a organisa un festival Mexicano Jr. na Club IOWUA y aki Linda a participa cu e cancion ‘Los Laureles’ y a keda premia como un di e dies finalistanan. El a bay representa Aruba den e grandioso Festival Mexicano di Antia, cu a tuma lugar na Holiday Inn Hotel na Corsou. Linda a duna un super bunita presentacion e anochi grandi aki. Den e tempo ey Linda tawata forma parti di Mariachi Montañeros di Noord. Desde e tempo ey Linda a sigui dedica su mes na canto y asina a sigui demostra su talento y engrandece su experiencia como cantante di e musica ranchera. Pa un tempo basta largo, Linda tabata forma parti di Mariachi Guadarincana caminda cu el a canta tambe na fiestanan familiar, cumpleaños, boda y otro actividadnan special. Linda a continua cu su participacion den mayoria di e festivalnan mexicano, demostrando asina su amor grandi pa e genero di musica aki, cu su voz sensual y un carisma y personalidad atractivo a sa di gana e popularidad cerca tur esnan amante di e musica contagioso aki di mariachi.
Den un entrevista cu Linda na un ocacion el a expresa cu tempo e y su primanan tawata teenager, nan a lanta nan mesun ‘Aguinaldo di cas’ y hunto den e temporada di fin di aña nan tawata canta tur e villanciconan di Venezuela: Tucusito, O luna, Fuego al Cañon etc. y aki nos ta mira e alegria y union cu hunto nan a forma pa asina gosa y canta den famia. Algo bunita di aprecia di e famia aki sigur. Linda no a para keto na e musica di mariachi so, sino a dedica su mes na musica y canto participando na diferente otro festivalnan e.o. Festival di Gospel, Festival di Dande, Festival di Tumba y tambe Festival dedica na nos himno y bandera, 18 di maart y tambe musica folklorico. Na varios ocasion, Linda Wolff a termina como finalista den diferente di e festivalnan aki, unda sigur semper a demostra su bunita voz den cada cancion.
Na aña 1994 Linda a participa na e grandioso Festival Tipico y Dande y aki Linda a keda premia como 1e finalista Dande Categoria Dama. Na aña 2010 Linda a participa na e Festival di Gospel – Soldadnan di Cristo y Linda a ricibi e premio di 5 lugar. Na aña 2011 Linda a ricibi e premio di 2 lugar den e mesun Festival Gospel – Soldadnan di Cristo. Na aña 2018 nos gran cantante Linda Wolff a ricibi su reconocimento bon mereci den un Cas di Cultura completamente yen, otorga pa Fundacion Artistar, riba un anochi di un grandioso Festival di Musica Mexicano infantil y hubenil. Algo hopi bunita pa aprecia di nos artista Linda Wolff ta cu el a tuma les di guitara y por a aprecie ta toca su guitara, cantando e cancionnan cu mas e tabata gusta. Despues di un tempo Linda, el a ricibi un invitacion pa forma parti di e agrupacion di Lirios del Campo, dirigi pa Vicente Tromp, como cantante y guitarista. Linda a canta cu Lirios del Campo na diferente actividadnan, pa cumpleaños, fiesta familiar etc. pero sigur tambe na su Virgen stima, la Virgen Guadalupana. Tambe Linda a canta den e agrupacion popular bailabel yama “The New Demension”, esaki prome cu el a bay forma parti di e agrupacion popular di “Placentero Ritmo y Cuerde”
LINDA SU TRAJECTORIA DEDICA NA E MUSICA FOLKLORICO CU TIPICO PLACENTERO RITMO Y CUERDE.
Linda a forma parti di e agrupacion Placentero Ritmo y Cuerde pa hopi aña.
Plancentero Ritmo y Cuerde bou direccion di Hemmy Croes. Por recorda un actividad na aña 1993 caminda Seaport Market Place tawata organisa actividadnan semanal y aki durante un Tropical Night, Plancentero a haci e anochi aki ambientoso y a zona ritmo y sabor pa turista- y localnan presente na Seaport Market Place. Sigur, un anochi unda cu Linda Wolff a caba di integra su mes den e agrupacion aki, cantando y moviendo yen di ritmo, cu e temanan di nan produccion. Durante Linda su trayectoria formando parti di e agrupacion aki, Linda a canta na hopi ocacion na fiestanan familiar pa cualkier celebracion durante tur temporada di aña. Tambe el a participa na diferente festival Y asina a haya oportunidad pa graba diferente temanan specialmente pa fin di aña, varios di nan compone pa Robert Maduro. E.o. Un regalo di Santa Claus – Noche Buena cu bo – Zona e tambu – Illusion Perdi – Ay amor amor no lagami so – Un man ta laba otro – Ven Mi Vida.
Linda Wolff, un gran persona, cantante cu un carisma inigualabel, caracter humilde y encantadora, semper alegre. Diamars a dispidi di Linda y el a laga tristesa atras, pero cu e consuelo di su recuerdonan bunita y inolvidabel.
Sosega dushi den cas di Señor, caminda sigur El a traha un luga bunita pa gosa di paz eterno den su Reino Celestial. Linda Wolff sosega na paz, dolor y sufrimento a keda atras. Drumi dushi nos amiga stima.
