Diasabra atardi pasa di 4or algun habitante di Sabana Grandi 50-C a topa cu un boa hopi grandi. E tabata scondi tres di un container. Nan no a duda dos biaha y notifica autoridad cu na su turno a manda Personal di Parke Arikok na e sitio. Na yegada a topa cu e Boa cu tabata hopi gordo y berdad hopi grandi.
A bay den accion pa saca e Boa for di e area unda e tabata scondi. E Boa tabata busca caminda pa sconde pasobra el a caba di come. E lo keda un siman scondi despues di un cuminda asina grandi. Ta calcula cu e por a come sea un pushii of un cacho mirando e largura di e obheto den barica di e Boa. E Boa lo wordo hinca den freezer na Parke Arikok. Expertonan di Merca cu ta atende cu investigacion riba Boa lo habri e Boa y asina saca afo kiko tin den bariga. Esnan di Parke sa con pa domina Boa.
Salvador Franken cu ta Hoofd Park Ranger den Parke Arikok a logra yama otro coleganan tambe cu a yega cu un caha special y bay cu e Boa. E famia tabata poco spanta cu un Boa asina grandi cerca di nan. Segun e Hoofd Park Ranger, ta basta Boa nan a haya e dianan aki pasobra e awasero ta pone nan sali. Hopi adres nan ta bishitando y saca Boa hasta for di camber.
