Nos ta den porta di luna di December. Un luna caminda cu tur hende ta cuminsa pensa kisas riba fiesta, celebracion, comemento, etc.
Pastoor Daniel Szpila a splica cu Iglesia ta acercando fin di aña tambe, pero un fin di aña liturgico, cual ta mas pronto cu un fin di aña civil.
E proximo diadomingo, dia 25 di November, ta e solemnidad di Cristo Rey di Universo, cu ta conclui e tempo liturgico y dia 2 di December ta prome diadomingo di Advent. Iglesia ta haci nos conciente di fin di temponan. Un dia tur cos lo keda conclui y cu nos ta sperando e primintimento di nos Salvador, cu e lo bolbe bin atrobe.
E tempo aki, tempo di advent, e prome simannan di December, te cu dia 16 mas of menos, ta ocupa pa nos bira conciente, pa nos prepara pa e segundo binida di nos Salvador, Hesucristo, pa su regreso den gloria como hues di bibo y di morto, pa conclui, locual ta e tempo pa inaugura ya e plenitud di bida, den gloria, den eternidad.
Esaki ta e parti hopi importante, hopi esencial di nos fe. Ta nos speransa tambe cu Cristo lo bolbe rescata nos di e scuridadnan cu ta afecta nos bida, di e abusonan cu ta herida nos bida. Pero rescata nos tambe di picanan cu ta den nos propio carni y cu ta causa nos tambe hopi sufrimento.
Esaki ta un parti hopi esencial di e tempo aki di fin di aña, cu den Iglesia, ya ta inaugura cu solemnidad di Cristo, Rey di Universo. Tambe ta logra e solemnidad cu ta haci nos compronde, cu Señor lo reina riba tur su enemigonan, lo bira banki pa su pia. Despues cuminsando cu 13 di December, cu e misanan di Aurora, lo cuminsa cu e preparacion pa conmemora Señor Hesus su prome binida hinca den su nacemento na Bethlehem. Esey tambe ta hopi importante pa conmemora y pa compronde con grandi ta e amor di Dios. Dios cu ta carga nomber di Emmanuel, kiermen Dios cu Nos, Dios na nos banda, Dios na nos fabor, Dios cu ta habita cu nos, encarna den Hesus y despues presente ta semper cu nos tambe den Eucaristia.
