Durante rekisitorio di Procurador General den e caso di apelacion Ibis awe, a trata e caso contra e comerciante Robbio di Vecchia. Ta acus’e di, a cambio di un ontheffing pa un di su trahadonan, cu el a instala airco na cas di Paul Croes, dunand’e un descuento hopi grandi mes!
Den su defensa, di Vecchia a bisa cu e mes tabata atende cu permiso di su trahadonan, pero den e caso aki, el a papia cu Minister Paul Croes di e caso aki y e mandatario a bisa di yud’e. Di Vecchia a bisa cu Minister Croes a pidie pa instala airco na su cas y manera tur cliente, el a dun’e un oferta.
Despues el a acerca e ex-mandatario pa check un permiso cu a haya conseho negativo y el a pidi minister Croes si e por yud’e den esaki. Pa e fabor aki, el a duna e mandatario un descuento, cu husticia ta considera, for di normal.
Diaranson fiscal a trece su exigencia dilanti, unda cu el a mantene sentencia anterior di Corte di Prome Instancia. A pidi Corte di Apelacion pa bolbe sentencia Di Vecchia na 40 ora di trabou pa comunidad of dos siman cera, c’un periodo di prueba di dos aña.
Rudmilla Yvonne Martinus:
Den e caso penal contra Rudmilla Martinez, unda ta acus’e di “actieve omkoping” door di tabatin contacto cu Selma Arends tocante compra di carchi pa concierto di Pasco. Procurador General no ta haya suficiente prueba cu el a comete e delito, pa cual el a pidi Corte Comun di Caribe Hulandes pa duna e sospechoso “vrijspraak”.
Jairo Wever:
Corte na aña 2019 a condena e comerciante aki na un multa di 5 mil florin, di cual mita ta condicional y cu un periodo di prueba di dos aña. Ta trata di un donacion di 1500 florin cu el a haci na campaña di Paul Croes. PG ta catalog’e como un intento di soborno. A opta pa mantene e demanda mescos cu den Corte di Prome Instancia.
Ninuska Nuñez:
E caso penal contra Ninuska Nuñez ta mas complica. Procurador General ta haya cu e ta involucra mas profundo den e caso di malversacion y soborno den Ibis. Ministerio Publico a pidi pa manda e caso bek pa Corte di Prome Instancia y pa trat’e completamente di nobo.
