Ta parce cu e desicion cu SKOA a tuma pa mantene su scolnan cera te cu proximo aviso ta un sorpresa. Pues, cu tur kleuter, basis y mavo cu ta resorta bou di SKOA no lo habri nan porta mañan, esta prome di september mientras cu scolnan di DPS si.
No ta for di awo Anuesca Baly, director di SKOA a elabora riba e topico aki. Y e situacion di e werksternan no ta un preocupacion nobo, ta for di hopi tempo caba ta reina incertidumbre entre SKOA, SIMAR y SEPPA contra di Gobierno di Aruba. Ta Minister Rudy Lampe, cu kier corta drasticamente den fondonan di subsidio pa paga e empleadonan di limpiesa. Awo, pa cu e tema di no habrimento di scol, ya for di 23 di juni 2021 SKOA a taha riba e situacion aki.
Durante un entrevista cu 24ora.com na luna di juni, e director di SKOA a bisa cu; si no yega na un solucion pa cu e werksternan, pues entre Gobierno di Aruba y SKOA, pa aña escolar nobo no lo descarta cu scol lo keda sin habri. Ta netamente locual ta bay sosode mañan tambe, pues, ta di spera un desaroyo entre Minister Lampe y SKOA riba e tematica aki, mirando cu na final di dia, ta e alumnonan ta perde les.
Claro, tin cu compronde tambe cu, e alumnonan no por haña les den un lokaal sushi. Durante un conferencia di prensa di gobierno recien, e prome mandatario a manda un mensahe clave pa Minister Lampe y SKOA, el a bisa: “Bay regla e asunto aki na mesa como hende grandi.”
