Den cuadro di e dia nacional di accion varios sindicato hunto cu nan miembronan a sali y pone trabou abo pa asina demostra nan malcontento y disgusto den e medidanan cu gobierno ta impone riba nan, OPPA tambe a sali afo y demostra cu ta basta.
Ivo Valdes, presidente di Organisacion di Pensionado Publico Arubano, a expresa inmediatamente cu OPPA no ta den protesta pa baha ningun gobierno. OPPA ta den protesta pasobra nan tampoco ta di acuerdo cu e forma cu gobierno ta trata nan. A enfatisa cu esaki ta un forma inhusto debi cu gobierno no kier paga nan locual ta debe nan. Aña pasa caba, a paga nan apenas mita di e suma y e aña aki a bolbe haya tende cu atrobe lo paga nan solamente 50% di nan gelijkbedrag.
“Nos ta pensionado, nos ta traha, durante nos trabou bo a kita placa for di nos y bo a firma e debe den forma den un ley di 2014 cu bo tin cu cab’i paga e debe na 2024 pero si e ultimo añanan cada bes bo ta paga mita, nos ta puntra nos mes ta ki di abo ta bay caba di paga e debe?”. Asina a bolbe enfatisa cu tin preocupacion ta reina bou di nan miembronan paso nan kier nan placa bek.
Pa cobertura mas amplio lesa edicion di TREMPAN mañan.
