Relaciona cu lockdown y e medidanan tuma a consecuencia di e pandemia actual, Stichting Hunga Teca, den cooperacion cu Heutink Foundation di Hulanda, a start cu e proyecto “Ban Pasa Pret cu Hunga Teca” na februari ultimo. E proyecto aki ta encera sali keiro cu muchanan di famianan vulnerabel entre e edad di 6 pa 12 aña y brinda nan e oportunidad pa ta mucha bek un rato.
Te awor aki, e fundacion a bishita Parke Nacional Arikok cu 2 diferente grupo. Cu ambos grupo a pasa algun ora na Philip’s Animal Garden y dos otro grupo a gosa di un clinica di beach tennis.
Riba diasabra ultimo, Hunga Teca a bay mira e pelicula Raya cu 38 mucha na Gloria Imax Cinema. E muchanan a haya esaki regalo for di MetaCorp. Na final cada mucha a haya un rugtas cu Digicel a regala como recuerdo. E tasnan tabata yena cu un puzzel, cortesia di SuperFood; juice regalo di Bix Brandsimport, cuki y juice patrocina pa Satex N.V., kleurpotlood y tekenmap di Hunga Teca, boter pa awa di Stern y Transporte El Gallo. E bus y e kid’s combo cu e muchanan a haya ora di wak e pelicula tabata cortesia di Heutink Foundation Hulanda. Pa mayoria di e muchanan, esaki tabata nan prome bishita na e cinema nobo. Nan a gosa un mundo di e experiencia bunita aki.
Hunga Teca ta gradici tur compania y boluntario cu a haci nan contribucion y aporte pa pone un sonrisa riba cara di e 38 muchanan aki y tambe riba cara di e 90 otro muchanan cu a bay e otro paseonan.
Hunga Teca a cuminsa manera un simia cu ora a sembr’e a cay den bon tera, cria reis fuerte y crece bira un mata chikito cu pocopoco a crece bira grandi dor di e sosten, cariño y aporte di masha hopi hende y instancia. “E sentimento cu ta prevalece awor ta di gratitud y alegria pasobra nos por a inicia e proyecto aki. Y nos ta spera cu e proyecto aki por continua pa e proximo 100 añanan cu ta bin cu e mesun energia, entusiasmo, pasion y amor cu HUNGA TECA a nace cune”, asina Yamila Hoevertsz-Kock, Presidente di e fundacion a bisa durante su discurso na ocasion di apertura di e fundacion na YMCA San Nicolas, na september 2019.
Ta comproba cientificamente cu hunga cu co’i hunga y wega, specialmente si esaki pasa den famia, ta contribui na un desaroyo total di un mucha. Ora un mucha hunga, e ta bira contento, sabi, creativo y ta crece lihe y miho. E ta siña anda cu otro hende, coopera, comparti y acepta su derota na un manera sano, locual ta prepara e mucha pa locual ta sper’e den comunidad.
”Ademas, hunga ta un di e derechonan di mucha. Laga e mucha hunga, core, cay, lanta, hari, yora, susha su curpa…esey ta bon p’e!”, asina Yamila Hoevertsz-Kock a enfatisa. Na Hunga Teca, e mucha, compaña pa un mayor, abuelo/a of educador por pasa pa fia un co’i hunga of wega educativo. Tur e co’i hunganan y weganan cu tin ta duna como regalo di otro muchanan. Di e manera aki un mucha ta siña e alegria di duna y comparti.
