Prome minister di Hulanda, Mark Rutte, a anuncia diahuebs e destinacion di 2 miyon di euro adicional pa e fondo Fiduciario di Union Europeo cu ta apoya Colombia riba materia di paz y un aporte di 4 miyon di euro pa e atencion di e problema migratorio genera for di Venezuela.
Rutte, kende a reuni cu presidente Ivan Duque den Casa del Nariño, a gradici na e Gobierno Colombiano pa e ricibimento di su delegacion, integra pa varios minister y empresario di mas di 110 compania Hulandes ‘dispuesto den haci negoshi na e bunita pais aki.” Tras e encuentro cu e Mandatario Colombiano y e firma di instrumentonan di cooperacion, e Prome Minister Rutte a declara cu su bishita tabata un exito, cu resultadonan grandi.
Riba e migracion Venezolano, el a cualifica como “increibel pa mira con Colombia y otro paisnan di e region ta trahando hunto pa haya un solucion.”
“Hulanta ta apoya nan y nos kier yuda nan. P’esey nos ta pone na disposicion di e Organisacion Internacional di Migracion (OIM) 4 miyon di euro pa apoya e recibimento di e migrantenan Venezolano den e region,” el a expresa.
Rutte a recorda cu Corsou, cu ta pertenece na e Reino Hulandes, ta hopi cerca di Colombia.
“Como bisiña di Colombia, Reino Hulandes ta sinti su mes hopi involucra y nos kier apoya nan semper cu ta posibel. Y esey ta e rason pa cual nos ta contribuyendo cu 2 miyon di euro adicional na e Fondo Fiduciario di Union Europeo,” el a sostene.
El a splica cu e mision empresarial cu a compañe a enfoca riab e sectornan unda cu su nacion ta lider, manera agricultura, logistica y transporte, maneho di awa y salud, y el a agrega cu “tin bon rason” pa inverti den Colombia.
“Nos tin un programa hopi prometedor. Y ta keda cla cu e bishita aki tabata un exito, cu resultadonan magnifico entre dos amigo. Y asina e ta sinti: dos gran amigo,” el a puntualisa. Mark Rutte, naci na Den Haag (Hulanda), ta Prome Minister di Hulanda desde 2010.
Cobertura Powered by Compra Ltd. & Romar Trading N.V.