Gobierno Hulandes ta bay yuda Aruba y Corsou cu 23.8 miyon Euro pa atende cu e influx di migrantenan Venezolano. A anuncia esaki den e Voorjaarsnota cu a bay Parlamento. Te awor Gabinete di Rutte a tuma e decision aki como un enfoke hopi cauteloso.
Es mas, no mas cu algun siman pasa abogado mr. David Kock a menasa cu entama un caso sumario contra Gobierno di Hulanda, pa e para responsabel pa e problemanan di migrantenan Venezolano na Aruba. E tempo ey a hala e caso atras ora Gobierno di Aruba a laga tur e Venezolanonan deteni den libertad mesora. Pues e “spoedeisend belang” no tabatey mas pa un caso sumario. Pero por lo menos Hulanda tabata sa e trayecto y e bataya legal cu ta spera nan dor di keda man crusa y sin asumi su responsabilidad.
E apoyo di Hulanda e ultimo lunanan tabata limita na un contribucion di 132 mil euro pa drecha e barak di e stranheronan na Corsou y parti di e experticio y e dunamento di entrenamento den e area di proceduranan di asilo. Na Aruba a manda empleadonan di Immigrate en Naturalisatiedienst (IND) di Hulanda pa brinda sosten y apoyo na empleadonan di DIMAS cu ta atende cu decenas di peticion pa dia pa asilo humanitario.
E distancia di Hulanda a provoca criticanan fuerte di parti di organisacionnan internacional di derechonan humano, cu a causa cu e mandatarionan responsabel, esta Blok, Knops y Harbers (kende a baha mientrastanto) a sigui insisti cu e politica di migracion ta responsabilidad di e paisnan autonomo, referiendo na Aruba, Corsou y Sint Maarten.
Tin indicacion cu Corte Europeo di Derechonan Humano tin un otro pensamento riba esaki. Si esey ta e rason dicon pa sorpresa di otronan, mesora 23.8 miyon Euro a bira disponibel, no por saca afo den e voorjaarsnota. A limita e splicacion den e nota na: “Gobierono a pone recursonan general disponibel pa solicitudnan di asistencia di Aruba y Corsou pa e aumento di migracion debi na e situacion politico na Venezuela. Secretario di Estado di Asuntonan Interior y di Relacionnan di Reino ta coordina e uzo specifico di e fondonan.”
