Diasabra ultimo a tuma luga e evento di Aruba Doet, den diferente districto y bario. Entre nan, tabatin e evento na Bushiri. FCCA hunto cu Universidad di Aruba a percura p’un evento bon hinca den otro. Pero apart di e trabounan boluntario, tabatin un wega di futbol amistoso.
A organisa wega entre e team campeon di Bushiri Boys contra un team di sorpresa. E team di sorpresa tabata consisti di diferente personahe, for di Altocomisario di polis, drs. Ramon Arnhem hefe di Veiligheidsdienst, Jury Nicolaas, Antonio Rangel y mucho mas. Un cos ta sigur, e team di Bushiri Boys a suta e Team Sorpresa.
Drs. Ramon Arnhem ta Altocomisario di Cuerpo Policial, y durante un entrevista cu 24ora.com el a conta cu e ta sintie na cas, mirando cu el a lanta den un bario estilo Bushiri. Den Bushiri ta biba dushi hende. Aunke, cu e team a haya un sota den weg’i futbol, e altocomisario a laga sa cu nan lo regresa pa mustra Bushiri Boys cu nan tambe por hunga futbol.
E ta importante pa polis ta cerca di e comunidad. Conecta cu e barionan ta importante pa un cuerpo di polis. “Asina mester ta y ta hunto nos mester bay dilanti”, asina Arnhem a comenta. Nan ta siña di otro, no obstante nan funcion y status di comunidad, tur por siña di otro. For di e altocomisario cu por siña di e amigonan di bario pero esunnnan di bario por siña di nan tambe.
Arnhem a comenta cu ta ganado so t’ey presente awe, bo tin dos opcion den bida, sinta den un huki y yora pa erornan cometi of ta lanta para y bay dilanti. Bo amigo polis ta den bario y tin cu sinti for di e pueblo kico ta nan necesidad y ta importante pa e funcionamento di polis. “Nan a laga nos sa kico ta futbol”, asina drs. Ramon Arnhem a termina bisando.
