Un rato pasa alrededor di 3:20pm polis a hay’e ocupa cu un caso di joyriding. Sucedido a tuma luga na Autowest Garage situa na Cumana 69, caminda cu un mucha a canta bingo ora cu a haya un auto marca KIA modelo Picanto para pafo di e garashi sin lock.
E no a pensa dos biaha mirando cu hasta e yab’i auto tabata den dje. A start e auto y ranca bay direccion pariba, a activa varios unidad di polis pa busca un Picanto color blauw. Despues di un rato polis a topa cu e hoben tra’i stuur na Piedra Plat, net dilant’i oficina di SVGA.
A detene y transport’e pa ward’i polis pa ey e proceso penal cana su caminda. Claro cu e proceso ta diferente mirando cu e ta un menor di edad. Un cos ta sigur, ley ta conta p’e tambe. Doño di e KIA Picanto numera A-68846 a presenta na Autowest caminda cu a conta polis cu el a bin pa traha un cita pa por drecha e auto, a menciona tambe cu tabatin varios articulo di balor den e auto.
