For di 4 pa 6 siman pasa dr. Horacio Oduber Hospital a cuminsa traha e protocol pa ta prepara, pasobra no cu nan kier pa tin un pashent den hospital. Hospital a cuminsa hopi trempan pa prepara y siman pasa a cuminsa test pashent. Den mundo nan tin definicion di un caso sospechoso generalmente ta un pashent cu problema di pulmon y ta un cu a bishita paisnan cu tin corona p.e. China, Italia.
A dicidi di test mas hende cu no necesariamente a bishita e paisnan ey, asina Infectologo Bert Rodenburg, a bisa. Nan no kier perde niun pashent. Siman pasa a cuminsa test hende cu tin problema cu pulmon y ningun test a sali positivo. Hospital ta riba tur cos pa ta bon prepara. Den varios departamento di hospital tin nan protocol pa Eerste Hulp, Poli y afdeling. Nan tin paña di proteccion suficiente den stock. Tambe tur dia nan ta den contacto cu otro instancia di salud di Aruba pa tin e protocol bon conecta. Mayoria pashent ta bay presenta pafo di hospital. Dokter di cas y otro instancia di salud tin nan protocol. Ta purba di pone tur protocol hunto pa tur traha hunto y sa unda pashent mester bay si ta sospecho.
Tambe a pone un definicion ken ta pashent sospechoso di coronavirus. Tur dia ta update e protocol. Ta lesa, mira y update, pasobra e epidemia no ta fiho y ta cambia tur dia. Ta papia hunto pa preveni cu lo tin un epidemia grandi for di control. Pashent sospecha di tin e virus, ta pone nan den un cuarentena te ora cu tin e resultado. Si e ta negativo e ta sali for e cuarentena, pero si ta positivo e ta keda eynan. E prome simannan e lo dura un par di dia, pasobra e ta un test nobo, segun infectologo Rodenburg. Cu tur test nobo e mester ta valida. Lo traha e test aki na Aruba mes, pero e resultado sigur lo manda esaki Hulanda pa un di dos control.
POR DUNA TEST MAS LIHE
Despues di un tempo, sea 30 of 50 test, hospital ta sigur cu e test ta bon, por duna e resultado hopi mas lihe. Hospital tin un afspraak cu dokter di cas y DVG cu ora e pashent tin sintoma di tos y keintura, e mester yama dokter di cas. Preferiblemente e no bay na oficina di su dokter di cas. “E dokter di cas ta bay yama e pashent pa dicidi, si e mester wordo controla pa coronavirus of no”, el a sigui bisa. No ta tur pashent mester bay hospital, pasobra no tin e capacidad pa test tur hende. E dokternan di cas tambe por test e pashent. Ta importante cu no ta tur pashent mester bay dokter di cas, pero yama si tin sintoma. Ta bay cuminsa un “hot line” pa yama manera otro paisnan tin cu ta habri 24/7.
TEAM SPECIALISA
Henter e team di hospital di infectioloog, microbioloog, ta hendenan specialisa con pa atende cu e situacion aki, asina Ronnie van Tright, Director Interino di Hospital, a bisa. Den e team tambe tin hende cu tin experencia internacional, hendenan aki a yega di traha den otro paisnan y den otro tipo di “outbreak”. “Nos tin e situacion bon pa nos, esta cu nos tin un team cu tin hopi experencia. Tambe experencia internacional riba con pa atende cu un eventual virus asina aki”, e director interino a bisa.
E team no ta hopi grandi, pero si un team hopi capacita pa crea e protocolnan y e defensa propio pa esaki na Aruba. Tin un localidad caba na bista y hospital tin contacto di cerca cu Ministerio di Salud, Minister di Salud tambe ta coordina varios di e procesonan aki. Ta tene reunion cu e departamentonan manera DVZ y DVG, riba un base continuo. Manera ta bayendo pa asina skirbi e protocol.
PROCEDURA
A papia riba kico ta pasa si hende ta positivo, pero tambe tin procedura pa cuida esnan cu tabatin contacto cu e persona aki. Tin 2 procedura andando y un di e proceduranan tapa cuida un persona cu ta sospecho, mientrastanto cu ta haci esaki si e test ta positivo tambe ta trece di biaha e famia y esnan cu e tin contacto cun’e mester bay den un cuarentena na cas. E director interino a indica cu mester preveni tambe cu e hendenan cu tabatin contacto cu e persona aki, por ricibi ayudo, pa pone nan den nan cas temporalmente pero bou supervision di instancianan cu gobierno tin actualmente pa haci esaki.
