Un hospital Frances a bin descubri den testnan di muestranan bieu di pashentnan di pulmonia cu a trata un homber cu tabatin COVID-19 desde 27 di december, casi un luna prome cu e gobierno Frances a confirma su prome caso.
Yves Cohen, hefe di reanimacion na Avicenne y Jean Verdier hospital den e parti suburbio nort di Paris, a bisa BFM TV cu cientificonan a test un biaha mas muestranan di 24 pashent atendi na december y januari, kendenan a test negativo p’e griep. “Di e 24, nos tabatin 1 cu tabata positivo di COVID-19 dia 27 di december,” el a bisa.
Inicialmente a cuminsa colecta e muestranan pa detecta griep haciendo uzo di PCR test, e mesun proceso di screen genetic cu tambe por uza pa detecta e presencia di Coronavirus den pashentnan infecta na momento di colecta muestranan. A test cada muestra diferente biaha pa sigura cu no tin erornan, el a agrega. Ni Cohen ni su team por a duna un comentario dialuna.
Francia, cu a mira casi 25.000 persona fayecido di e virus desde 1 di maart, a confirma su prome 3 casonan di COVID-19 dia 24 di januari, inclui 2 pashent na Paris y otro na Zuidwest di Bordeaux. Cohen a bisa cu ta demasiado trempan pa haya sa si e test positivo COVID-19 di pashent di 27 december ta “pashent cero” di Francia. Hayando sa ken ta e prome ta critico pa compronde con e virus ta plama.
El a sigui bisa cu e pashent a sobrevivi y a realisa e prome investigacion pa haya sa di e prome contaminacion. “E tabata malo pa 15 dia y a infecta su 2 yiunan, pero no su casa, kende ta traha den un supermercado. E tabata sorprendi, pero no a compronde con el a infecta. Nos a pone e puzzle hunto y e no a haci niun biahe. Su unico contacto tabata cu su casa.”
E casa di e homber tabata traha banda di un Sushi stand, cerca di coleganan di origen Chines, Cohen a bisa. No ta sigur si e coleganan ey a biaha pa China, y e autoridad local di salubridad mester investiga, el a bisa. “Nos ta puntrando nos mes si e tabata a-sintomatico,” segun Cohen. “E por ta e ‘pashent cero’, pero por ta tin otro den otro regionnan. Tin cu test tur PCR negativo di pulmonia un biaha mas. Probablemente e virus tabata circulando caba,” el a termina bisando.
