E aña aki un biaha mas ta tuma luga e celebracion di Arubadag na Madre Patria, Hulanda. Un di e artistanan cu lo tene su presentacion e aña aki ta Honeypot. P’e motibo aki tambe, nos di 24ora a combersa cu ne net prome cu el a subi avion. Chayo Tromp sigur ta contento cu Arubadag t’ey bek, despues di 4 aña.
Honeypot a ricibi un invitacion pa duna un presentacion di roots/reague, den su estilo unico Caribense den The Return of Arubadag y nan ta cla pa duna lo miho di nan.
Honeypot semper tabata tin su cancionnan original, nan clasiconan manera Livin’ easy, Muchacha Borracha y asina mucho mas. Nan ta cla pa deleita e Rubiano- y tur esunnan presente durante Arubadag e aña aki. Pero tambe Honeypot tin un cancion nobo cu nan a graba, pero cu ainda nan no a lans’e y Hulanda lo tin e primicia pa scuch’e pa prome biaha. Spera riba dje, Chayo a bisa.
Pa e presentacion aki, Honeypot ta biahando cu cuater integrante pa ta parti di e celebracion.
Na final, Chayo a gradici tur esunnan cu a haci e biahe aki posibel. Honeypot lo tin un album nobo e aña aki pa tur su fanaticonan cu tin hopi tempo sperando riba dje.
Honeypot ta spera riba su fanaticonan den e gran celebracion di Arubadag den Broodfabriek na Rijswijk, Hulanda, diadomingo awo.
