Diasabra, pa mas of menos 7’or y 20, polis di Noord a presenta na un cas na San Miguel pa un problema familiar. Na camindan nan a bin topa dos mucha para band’i caminda. E dos muchanan a subi den auto y hunto cu polis nan a bay na e cas na San Miguel. Na e adres, e muchanan a bisa polis cu nan tata tabata haciendo fastioso cu nan mama.
Despues cu polis a bati porta, nan a bin topa cu e tata. A yama e tata pa bin pafo pa asina papia cun’e. Mesora nan a tuma nota cu e homber tabata tin algun drink den curpa. A splik’e kico ta e consecuencia di su actonan. Despues di a tuma dato di e mama di e muchanan, polis a notifica e cabayero cu e lo keda deteni pa ta bao di influencia. E homber dado momento a bira agresivo cu e mama.
Mirando e hecho aki, no a keda nada otro pa pone boei na su man. E homber practicamente a cuminsa yora manera cu polis a haci esaki. A splike cu e ta bay warda, pa asina e por sosega su body y e dia siguiente, ora cu e haltura baha, e por bay bek cas. A pidi pa un transportwagen, pa asina hiba e homber warda di Shaba. Despues di esaki paz y trankilidad a reina na e cas na San Miguel.
