Esaki tabata un decision cu a sorprende hopi hende. Na inicio di e siman aki ainda den tratamento di e apelacion Procurador General a pidi un castigo di mas cu 20 aña y awe e schors su detencion.
E ta cera, mescos cu Jafet Cabrera Baez desde maart, 2022, pa complicidad den asesinato di Frans Angela na Zeewijk.
Ta trata di Walkidia Winterdaal, condena door di Corte di Prome Instancia na un castigo di prizon di 18 aña igual cu su pareha Jafet. Fiscal den prome instancia y procurador general a pidi 25 aña.
Tur e partidonan a apela pa motibo cu ta haya e castigo demasiado abou (OM) y e acusadonan a hay’e demasiado halto.
E tratamento a tuma luga dialuna ultimo y a finalisa despues di 7:00 di anochi. Walkidia a wordo representa pa mr. John Zara y Jafet Baez pa mr. Doris Canwood.
Den e sentencia di prome instancia ta para of describi e forma cruel cu a actua cu e victima Frans Angela dia 18 di maart, 2022. Hasta a pasa auto riba dje, ora cu e tabata na bida ainda. Esaki a pone cu Corte di Prome Instancia a condena ambos na 18 aña.
Pero ta parce cu e argumentonan cu abogado Zara a uza pa mustra cu e rol di su cliente Walkidia Winterdaal no tabata asina grandi manera esun di Jafeth. A pesar cu a pidi 25 aña y a pesar cu hof a bisa cu den tres siman lo anuncia e decision, e decision a bini dos dia despues di e tratamento.
Mr. Zara durante tratamento a bisa cu e rol di su cliente no tin nada di aber cu complicidad. No tabatin un plan traha, y no por a proba esey tampoco. Na momento cu Jafeth lo a comete su acto, Walkidia a cana bay for di e sitio pasobra door di su embaraza e ta haya cu e cos ey no ta bon pa e pasa aden. Tambe a bisa cu e no tabata stuur e auto ora cu a pasa riba e victima y e no a participa activamente den esey.
E argumentonan aki a convence hof cu en espera pa anuncia su decision a ordena pa schors su detencion pa e bay cas en espera di e decision di hof dia 27 di november awo.
