Contrario na loke cu Corte di Prome Instancia a dicidi, e biaha’ki Hof a tuma un otro decision den e caso entre Aruba Bank y Otmar Oduber. Awo Hof a dicidi cu e banco tin tur derecho pa nenga di habri un cuenta, mirando e consecuencianan cu esaki por trece pa e institucion financiero.
Diamars, 31 di october, finalmente tabatin un decision den e caso aki despues cu a pospone pa 24 luna largo. Despues cu e decision den prome instancia a cay na fabor di Otmar Oduber y Bochincha Container Yard (BCY) y cu e banco mester a habri un cuenta, e institucion financiero a dicidi di apela.
BCY tin loke ta yama un foodcourt consistiendo di diferente negoshi pa consumi cuminda y bebida. Pa esaki e mester di un cuenta di banco pero su banco a nenga esaki debi na miedo pa daño cu esaki por causa na su reputacion. El a bay Corte y a gana e caso. Corte a bisa e tempo ey pa habri un cuenta, mientras cu no tin un decision den bodemprocedure cu ta bisa diferente. Y a pone e condicion cu si Corte haya Oduber culpabel di loke ta acuse, e banco tin derecho pa kibra e relacion dunando un periodo di dos luna.
Hof a bisa cu nan a yega na un otro conclusion, pasobra a husga e caso di nobo a base di e circunstancianan na momento di e decision aki.
A cuminsa e negoshi prome cu autoridadnan a haci entrada hudicial na cas di Oduber den cuadro di e investigacion penal yama Flamingo. Un investigacion cu tin di haber cu soborno, labamento di placa, abuso di poder y participacion na un organisacion criminal cu terenonan di gobierno. Tur esaki cometi tempo cu e tabata minister.
Loke cu a pisa den e caso aki ta cu e banco, pa tur su otro clientenan, mester hiba un maneho adecuado pa garantisa un ehecucion integro di negoshi bancario.
Den e investigacion cu banco a haci, a sali na cla cu na Colombia, a deposita 40 mil florin (converti) cash riba cuenta personal di Otmar Oduber. Den e transaccion ey tabata envolvi e socio di Otmar Oduber, esta Helder, kende ta sospechoso den un caso penal di Flamingo.
Tur esaki y hopi mas a hunga un rol den e decision di banco y tambe a hunga un rol den e decision di Hof. Nan ta bisa cu e interes di banco pa mantene un bon reputacion ta pisa mas cu esun di Oduber. P’esey a duna e banco rason.
Pa relato amplio lesa TREMPAN.
