Diabierna marduga pa 4:20 central di polis ta haya notificacion cu dama a ser tira na un cas na Flamboyantstraat. Na yegada di e patruya ta bin topa un persona tira abou den sala cu un tiro den cabes.
Mesora a pidi presencia di departamento di recherche, polis tecnico y slachtofferhulp. E caso ta bao di investigacion, pa asina purba haya mas tanto posibel spoor pa determina ken por a comete e acto aki. Lito Lacle, vocero di Cuerpo Policial, a indica cu pa 5:40 am dokter Texier a constata morto di S.R.C. Petronia naci na Aruba di 20 aña di edad. E prome parti departamento tecnico ta haci y despues recherche ta tuma over pa sigui cu su investigacion.
Ultimo tempo ta tende di tiramento pariba di brug, segun Lacle, polis ta un organisacion cu ta draai riba informacion. P’esey ta hopi importante pa pueblo di Aruba coopera cu nan si tin cualkier informacion riba e casonan aki. Un ehempel ta e drive by shooting cu a sosode recientemente.
Pa Cuerpo Policial por resolve mas caso cooperacion y informacion di pueblo di Aruba ta hopi importante, p’esey ta pidi si tin cualkier informacion pa yama e tiplijn: 11141. “Yamando e tiplijn, nos ta garantisa cu bo ta keda anonimo. Pero nos ta haya informacion suficiente pa bay over na resolve e caso aki”. Trabou di Cuerpo Policial ta pa resolve e caso mas pronto posibel. Lacle ta pidi esun cu por tin informacion di e caso, pa yama e tiplijn y laga e informacion aki p’asina por resolve.
