Aruba Chess Challenge 2023 ta un campeonato internacional tumando luga e fin di siman aki na Hyatt. E campeonato aki ta existi caba pa diesshete aña. Despues di pandemia a stop cu e campeonato aki, pero awor ta bek riba dje cu nuebe pais participante.
For di Panama a bini e presidente di FIDE America unda cu Carol Pesqueira-Williams, Presidente di Federacion di Ahedres di Aruba tambe ta forma parti di e gerencia. “Ta elogio pa Aruba, un isla asina chikito pa nos tin un representante den FIDE America.”
Aruba Chess Challenge 2023 ta consisti di 101 participante anto e comparti den tres categoria: U12, U18 y Open. Pa loke ta U12, esaki ta si e hungado tin menos cu diesdos aña. Si e hungado tin diestres aña, e tin cu participa den U18, pero e por gana un premio den su categoria. “Pasobra nos ta premia U8, U10, U12, U14, U16 y U18.” Tabata tin un acto protocolar cu e trabaonan duro, dia y anochi sin drumi, pero satisfecho.
“Tur esunnan presente, trece boso yiunan, pasobra esaki ta yuda nan bon na scol ora nan tin cu pensa, e mucha ta pensa su set adelanta. Asina tambe e ta pensa su futuro tambe delanta. E ta un deporte hopi trankilo”, segun Williams. Tin hungado ta sinta cinco pa seis ora concentrando riba e borchi di schaak. E competencia a cuminsa dia 5 di october y lo termina riba 8 di october, esta diadomingo awor. Si tin mayor cu lo kier pa nan yiu participa por yama 560 0009 of 563 0212.
