E di 56 edicion di Bonaire Sailing Regatta ta inicia dia 6 di october. E aña aki tambe partnernan di cadena di e team Multidisciplinario Maritimo Hub Boneiro (MMHB) lo ta activo pa tene Boneiro safe durante di Bonaire Sailing Regatta.
Duana, Koninklijke Marechaussee (KMar), Wardacosta, Cuerpo Policial Hulanda Caribense (KPCN) y Entidad Publico Boneiro (OLB) lo supervisa y controla riba cumplimento cu tur ley y ordenansa cu ta na vigor y di importancia pa cada partner di cadena. E servicionan lo sostene otro durante di ehecucion di e tareanan aki. Ademas lo tin empeño extra for di e diferente servicionan na momento cu yudansa di emergencia ta necesario.
E supervision y control lo tuma luga den e awanan entre Corsou y Boneiro, rond di Boneiro y den bahia di Kralendijk.
Duana
Duana ta supervisa trafico di bienes cu ta crusa frontera y ta controla si ta sigui e procedura corecto na momento di entrada, salida i transito i tambe si no tin articulo prohibi presente.
KMar
Koninklijke Marechaussee ta responsabel pa control di frontera na Boneiro. Haciendo esaki Kmar ta controla e condicionnan di entrada di persona y tambe ta contribui na combatimento di criminalidad cu ta surpasa frontera.
Wardacosta
Wardacosta lo eherce control riba validez di documento di boto manera tarheta di registracion y permit pa nabega. E documentonan di barco aki mester ta valido pa area di Boneiro. Banda di esaki Wardacosta ta controla tambe e cantidad di persona cu tin na bordo di un boto conforme e carchi di keur y ta mantene orden publico y siguridad.
KPCN
KPCN ta responsabel pa mantencion di orden publico y pa duna asistencia na un y tur cu mester di esaki.
OLB
OLB ta supervisa uzo corecto di boei y caminda di mara pa boto. Esaki ta inclui control riba ancramento y ta retira boei cu no ta autorisa. Durante di Regatta ta permiti pa mara pa un rato na e nort pier pa atende cu duana, pero boto no mag keda mara eynan. Relaciona cu e multitud ta conseha doño di boto fuertemente pa regla un luga di mara prome cu nabega pa Boneiro.
MMHB ta haci un peticion na un y tur pa subi awa bon prepara y pa den caso di pregunta tuma contacto cu e servicio concerni.
