Horcan Irma tabata devastador na St. Maarten ora cu el a toca tera diaranson y por bisa cu hopi edificio a wordo distrui, famianan a keda sin cas, e falta di awa y coriente ta bisto, sin conta e saqueo cu ta tumando luga.
Algun persona, cu ta for di St. Maarten cu tin hopi aña biba na Aruba, naturalmente, kier duna nan famianan un man y tambe e Arubianonan cu ta biba riba e isla ruman aki. Mañan, diasabra, cuminsando pa 6’or di atardi na Theresita Center lo bay tin un evento di recaudacion di fondo, pa asina cu pueblo di Aruba por bin trece articulonan di prome necesidad, paña, awa, loke sea pa por contribui na e situacion lamentabel cu St. Maarten ta pasando aden. Nos a combersa cu Sarita Ramdas, kende tin masha hopi tempo ta bibando na Aruba y el a conta nos cu ainda e ta corda cu na 1995, Horcan Louis a haci un desaster na St. Maarten y na e occasion eynan, Gobierno di Aruba a manda 3 avion pa asina trece e Arubianonan biba eynan bek na Aruba.
E biaha aki, e peticion ta bay un biaha mas na Gobierno pa manda por lo menos 3 avion, tanto pa abastece e pueblo di St. Maarten cu provision, pa asina nan por mantene nan mes y por tribi bisa pa trece algun di nan Aruba, mas tanto e muchanan cu no por biba den un situacion asina eynan, pa nan bin Aruba temporalmente pa por sigui nan scol y tambe pa nan por biba temporalmente, te ora cu cos calma y cu nan por rehace nan bida bek na St. Maarten manera mester ta. Sin lubida e Arubianonan cu ta biba na St. Maarten, cu por wordo acogi cerca nan famianan aki na Aruba, mirando e catastrofe cu a sosode eynan. Asina ta, bin sin falta, yuda cu bo granito de arena, pa asina yuda nos rumannan di St. Maarten haya nan bida bek.
