Tur dia no ta mesun dia, hopi hende kier biba riba nan propio forsa, riba nan mes ideanan, den un orguyo y arogancia , hopi fuerte, y lubida cu Dios ta doño di tur cos.
Nos kier pa tur hende habri nan wowo, y wak kico ta pasando rond mundo, e ultimo 20 anja paisnan grandi tabata broma cu nan forsa militar, ken tin bom nuclear aunke e población ta muri di hamber, ken tin mas avion di guera , ken tin mas misil, ken tin mas soldat, ken tin raket di largo alcance, drone militar, etc. Y miyones a wordo inverti den arma nobo, cu e pensamento con ta destrui e ser humano.
Awor aki tin un virus cual ningun di e armanan ey no ta capaz di destrui, y e virus no a respeta ningun pacto militar ken tin mas arma y mas soldat. Pasobra tur e armamento di mundo ta plan di hende y no di Dios.
Esaki ta djis un señal dicon nos tin di hala serca Dios, pasobra tur hende tin mester di Dios, tanto homber como muher, pasobra sin Dios nos no ta bay logra.
Dios a demostra mundo den Juan capitulo 3 vers 16 cu e ta manda su yiu unigenito pa ken cu kere den dje no bay perdi ma haña bida eterna pa medio di Su Yiu. Den e buki di Hebreonan capitulo 12 vers 14 Dios ta bolbe recorda nos; Aspira pa tin paz cu tur hende y santificacion, sin cual ningun hende lo mira Señor. Ora e miho amigo por bandona bo, perdida di trabao , negoshi, miembro famia, sabi cu Dios tey pa bo na e mesun lugar di custumber.
Den e buki di Job capitulo 1 vers 10 e diabel a kere cu Job tabata sirbi Dios pa cos y ta pesey Dios a traha un trankera rond di Job, pero e tabata mal ekiboka pasobra , Job tabata un homber cu curazon pa Dios, cu aunke Dios a permiti diabel destrui tur cos di dje, toch Job a keda pega na Dios. Y dios a dune tur cos bek.
Job tabata stima Dios pa ken Dios ta den su bida.
Nos mester hala pega serca Dios , pa nos tin refugio, den e momento nan di golpi di bida, pasobra bo forsa natural, placa, negoshi, no por sostene bo spiritualmente, ta solamente e Spirito do Dios lo keda cu bo, pasobra Dios nunca ta bandona ni tampoco e ta laga su yiunan pasa berguensa.
Awor aki hopi hende ta perde trabao, of negoshi, y hopi hende mester di sosten spiritual pa nan por sobrevivi, y lanta bek riba pia,pasobra hopi a cuminsa nota cu placa no ta tur cos. Ta tempu pa haci oracion, uni bo mes cu hende di oracion, busca Dios su cara constantemente, pasobra e enemigo ta busca tur manera pa haci e situacion peor, pero Dios den su misericordia tey pa yuda nos, y lanta nos. Ta tempo pa pordona y laga los na cosnan bieuw, ta tempo pa confia Dios y entrega tur cos den man di Dios.
Ora nos lanta nos cas riba e barranca cu ta Cristo Hesus, nos ta sabi , pasobra ora mal tempo bini, Cristo ta nos refugio. Laga nos uni cu henter Famia, haci oracion y hala pega mas serca Dios. Pastor Marcel Balootje.
