Haim Hochman di 71 aña di edad awe a fayece pa mas of menos 4:00pm den cura di su cas na Alto Vista. A yama ambulance p’e pero no a logra scap’e. Parce cu el a haya un ataca di curason den su cura di cas y a fayece na cas mes. Awe mainta el a bay desayuna cu su famia na un pancake house.
Eyden el a sinti su curpa malo y a pidi nan pa hib’e cas. E no a sinti bon mas y tabata parce cada biaha cu su condicion tabata empeora. Atardi el a haya un ataca di curason cu a caba cu su bida.E tabata topico di discusion e ultimo siman aki, despues cu el a perde caso na Corte di Casacion na Hulanda contra su rumannan. Tur pa un guera di hopi aña pa el a keda cu herencia di 100 miyon dollar di su mayornan Kalman y Anna Hochman-Britten.
Haim a maneha e fortuna di su tata y mama, e doñonan di La Linda, pa e ultimo decadanan aki. Sinembargo, e no kier a parti e herencia cu su rumannan, pa cual a start un bataya legal cu el a cab’i perde te na Hulanda. Cu e decision di hues, a kita su acceso na fondonan casi ilimita di famia, na Aruba, na Panama, na Suisa y na Merca. Mayoria fondo su rumannan tin beslag caba riba nan.
Awo ta abogado mr. Jeannot de Cuba lo maneha e fortuna, partie entre e herederonan y pa sigura cu ta honra e testament di e tata y di e mama. Tin cuater yiu, di cual dos a fayece, pues mester atende awo cu nan yiunan.
Haim Hochman ta e yiu mas chikito di Kalman y Anna Hochman. A dun’e e encargo pa maneha e fortuna di famia pa 5 aña, bende tur propiedad y negoshinan y parti e placa entre e herederonan.
E no a hacie, sino a purba bringa su rumannan p’e keda cu henter e fortuna, calcula na 100 miyon dollar. Awe el a muri bay sin cu e por a cobra e herencia di su mayornan. Paz na su restonan y forsa na su famia den e momentonan dificil aki, yena di tristesa. Cu Haim sosega na paz.
Haim Hochman a bay laga atras su casa Maria y su yiunan Aaron y Beulah.
