Desiree de Sousa-Croes, hunto cu algun habitante di Pos Chikito cu ta rabia, cu e presencia di un centro di reciclahe den nan bario, a bin Bestuurskantoor pa entrega un manifiesto.
Pueblo por mira tambe cu nan ta exactamente 1808, cual tabata e intension tambe pa yega na e cantida di firma ey. Ta algo simbolico pa nan, cual ta representa e cantidad di votonan cu Minister Otmar Oduber a haya den e ultimo eleccion. Kier mustra cu e cantidad di personanan aki cu a haci un diferencia grandi den nos comunidad. Mescos cu e por haci algo cu e habitantenan ta sinti cu ta contra di e bario, e mesun cantidad di firma, ta para bisa cu e no por haci loke e tin gana di haci awor aki di bay huur un edificio y pone mey mey di e bario, un luga cu sea ta sortea sushi, sea ta recicla, pero e cosnan aki e habitantenan ta haya cu no mester pasa mey mey di un bario, pero mester pasa na Barcadera.
Ta un bon idea, pero no mey mey di un bario. Ta pa e motibo aki de Sousa-Croes y e habitantenan cu tabata presente, hunto cun’e dilanti Bestuurskantoor, cu e firmanan recogi di Pos Chikito, pa amigonan di nan cu a sostene e accion aki, un accion relampago, a haci’e den dos dia. Despues a warda reaccion di minister, kende a keda riba su punto cual ta un proyecto berde y limpi. E no a convence e habitantenan cun’e. Sushi, pa con chikito cu por ta, si core banda di Barcadera, unda cu tin sorteamento, ta hole masha malo mes. Den tur cos cu ta uza tin material organico y ta cosnan cu ta daña. E ta trece djaca, e ta trece raton, cacalaca, musca, tur e tipo di insecto y otro bestia cu ta malo pa nos salud. E ta bay trece nan den e bario.
Si bay bende bo cas dilanti di e luga y ta splica unda e cas ta y ta dilanti di e luga cu ta recicla sushi, por wel di lubida pa bende e cas. E balor di e casnan lo baha. Esey ta 100% sigur di dje.
Pesey mes tambe, e grupo chikito aki a dicidi diahuebs pa entrega e manifiesto, pasobra no a hayando ningun informacion di e minister cu por a kita e preocupacion cu por tin. A dicidi cu ta entrega e manifiesto diabierna. Entregando e firmanan no ta final di e accion. A papia caba cu abogadonan y e intension ta pa bay mas leu pa purba di para mudamento un parti di Serlimar den e bario di Pos Chikito.
Oido
E intension ta pa haya oido mas pronto posibel. A duna e ministernan beneficio di duda pa bin splica, bay cerca e grupo, pa sa kico e preocupacion ta. No ta asina cu ta bin hunto cu algun habitante, parti di pueblo y ta drenta paden y ta secretaria ta papia cu cuater of cinco bodyguard rond di dje. Pasobra nan tin miedo di un grupo chikito. Ta hendenan cu pa nan yega eyriba cu a kibra cos den e luga eynan y awo tin miedo di nan. Ta un grupo di hende di Pos Chikito, hendenan trankil. Nan ta conoci pa ta hende pacifico, pero no ta acepta pa hinca un bari di sushi den sala di cas. Esey ta loke nan no ta acepta.
Hecho ta cu ta un luga cu ta bay trece no cosnan bon, solamente cosnan malo. Mester tum’e hopi simpel. No por bisa cu e ta bay trece economia pa e bario di Pos Chikito. E no ta bay hiba e bario dilanti, e lo bay hib’e atras.
Ta duna e minister 1 siman pa 10 dia pa e por duna su reaccion, mirando cu e no tey. Tambe a entrega na presidente di parlamento e manifiesto cu lo entrega na su turno na e parlamentarionan, pa asina por bin pregunta tambe for di miembronan di parlamento. Ta regala nan e preguntanan di e habitantenan, pa asina haya un contesta for di e minister. Despues di esey mester bay den un otro accion. E siguiente paso ta bay corte. E grupo aki y tur 1808 persona y hopi mas cu a yama pa bin firma, no lo bay acepta sin mas cu lo bay bin un “dump” den bario di Pos Chikito, ni cuanto cu kier sugarcoat’e, pint’e bunita. Hecho ta cu e ta un luga cu sushi lo bin pa verwerk’e eyden, pa kico cu nan kier haci cun’e. Ta algo cu no mester haci den un bario, segun de Sousa-Croes.
