Algun siman pasa, ATIA a acerca Prome Minister mr. Evelyn Wever-Croes pa atende cu e huma dañino cu ta sali for di WEB y vu ta afecta trahadonan di ASTEC. Mesora a yama un reunion cu ASTEC, A.P.A., W.E.B. y Directie Natuur en Milieu pa toca e tema aki.
Aparentemente e huma cu ta sali for di WEB ta dañino pa hende cu ta traha den cercania di esaki. E ta afecta wowonan, cuero y garganta. Di banda di ASTEC nan a splica con e trahadonan ta sufri bou di e circunstancianan aki.
Prome Minister a duna di conoce cu W.E.B. su prome reaccion ta cu nan ta situa eynan for di hopi tempo. Ora cu e Gobierno anterior a dicidi di muda e Waf nan no a haci ningun investigacion referente e calidad di aire. A.P.A. cu a bay di acuerdo pa move e waf pa Barcadera, tampoco a haci un investigacion. ASTEC cu a tuma e trabou na Waf na Barcadera tampoco a haci un investigacion di e calidad di aire y awo ta sinta cu e hecho cu e aire ta afecta e trahadonan.
W.E.B. di su banda a bisa cu e no tabatin pensa den termino corto pa haci ningun inversion pa cambia esaki, pero Gobierno y Prome Minister di Aruba a haci un peticion na W.E.B. pa busca un solucion.
Prome Minister enfaticamente a bisa; “Pasobra ora ta trata di bida di hende, salud di hende no ta haci wega, nos mester busca un solucion.”
Lamentabel di tur esaki ta, segun Prome Minister, cu W.E.B tin un vision y tin su plan di inversion cla, awo mester desvia di su plan, pasobra Gobierno anterior, ora di a haci e mudansa no a haci su trabou manera debe ser.
“Na fin di dia ora ta trata di salud di hende, e Gobierno aki ta pone esey como number un”.
W.E.B. a bay den su seno y a bay busca un solucion. Tin diferente solucion cu por pensa riba dje. Entre otro por pone un filter riba e tubonan. Por hisa e tubonan un poco mas halto pa e huma bay un poco mas leu. E tipo di inversionnan aki ta costa hopi y ta tarda pa yega asina leu.
W.E.B e ora a bay busca un otro solucion, cu ta den e calidad di e crudo cu WEB ta uza pa genera coriente. Den e caso aki nan ta cumpra un crudo a traves di FMSA di RDA cu tin sulfer na 3%, algo cu segun W.E.B. a splica no ta contra ley, pero ta locual ta afecta e trahadonan. Awor W.E.B. lo busca un crudo cu ta contene menos sulfer, sea 2% of 1.5% pa asina e efectonan di e gasnan cu e ta saca no afecta e trahadonan.
Ta calcula cu lo dura entre 6 pa 8 siman pa yega asina leu. Ta cuestion di busca un otro compania for di cual lo cumpra crudo y pa kibra e contract cu tin actualmente y cuminsa ricibi e crudo aki di un otro calidad. Esaki lo trece gasto cu ne cu WEB no a tene den consideracion, pero ora ta trata e bida y salud di hende, esey ta bay prome.
Prome Minister a expresa cu e problema aki tin’e hopi preocupa y indigna pasobra un Gobierno anterior cu a hinca tanto placa den promove Aruba como un green island cu greenenergy, pero ora ta trata cu salud di hende, loke ta mas principal, nan a lubida. Nan a prefera di a bay hinca placa den show, den papia hopi tocante energia alternativo pero loke ta mas importante cu ta pensa riba salud di hende nan no a pone atencion na esey.
Prome Minister a sigui bisa: “Pero nos como Gobierno, mescos cu diferente otro problema cu Gobierno anterior a ocasiona, nos tin cu atende cu n’e y nos ta atendiendo cu n’e. Salud di hende na prome luga, trahadornan di ASTEC ta na prome luga. Y den 6 pa 8 siman e situacion aki ta coregi, algo cu pa añanan no a wordo atendi cu n’e”.
Prome Minister ta pidi tur hende pa yudanan cu esaki y pa carga poco mas pasenshi. E ta compronde cu ta dificil. Pero tambe pa e trucknan cu a bay ayera den accion, pa nan compronde cu esaki ta otro herencia mas di e Gobierno anterior y cu e Gobierno aki SI ta atendiendo cu n’e y lo bin cu e miho solucion cu ta na bienestar di e trahadornan di ASTEC y tur esunnan cu ta depende di dje.
