Corte: Pa 5 aña no mag traha mas como Polis

Ayera mainta Hues a dicta sentencia den e caso penal contra Gilbert Yarzagaray y Angelo Webb, miembronan di Cuerpo Policial Aruba, ambos acusa entre otro di maltrato pisa riba un homber na Madiki despues di parada di carnaval e aña’ki.

Den e caso aki a kibra nanishi, kaak, djente y cash’i wowo di e victima. El a keda di haci un caso civil pa daño y perhuicio, ya cu ainda e no a caba cu su tratamento completo.

Foto exclusivo di 24ora.com, ora cu ta transporta e detenido, despues di parada di carnaval grandi, 26 di februari 2017 na e adres Paradijs # 20-F.

A haya e Gilbert Yarzagaray culpabel di maltrato pisa. Esaki ta nifica cu tur e slanan of fracturanan cu e victima a ricibi ta cay riba dje. Tur e pruebanan treci dilanti, incluyendo declaracion di coleganan, ta mustra cu Gilbert ta esun cu a comete e maltrato pisa lagando e homber, pa kende a pidi asistencia, den un estado asina maltrata.

Miembro di Cuerpo Policial Aruba, Gilbert Yarzagaray, castiga cu 12 luna di prizon, di cual 4 luna ta condicional y durante 5 aña no por traha mas como Polis.

Corte a lamenta e uzo excesivo di forsa door di e funcionario policial Yarzagaray. Mirando e cantidad di polisnan presente, esaki no tabata necesario. Pa e motibo aki a dicidi di bay di acuerdo cu e demanda di Fiscal, esta un castigo di 12 luna di cual 4 luna ta condicional y durante 5 aña e no mag eherce e profesion di Polis.

Angelo Webb, miembro di Cuerpo Policial Aruba, castiga cu 30 dia di prizon di cual 14 dia ta condicional, pues net e dianan cu el a psa cera caba. A dune tres aña di prueba.

Den e caso di su colega, Angelo Webb, el a admiti di a dal e homber burachi dos cantiman, Hues y Corte a haya proba solamente maltrato simpel. Pa esaki el a impone un castigo di 30 dia di cual 14 dia ta condicional, y tres aña di prueba. Ambos a pasa 13 dia den detencion preventivo prome cu a recobra nan libertad, cu condicion cu mester sigui un curso di maneho di agresividad. Asina cu a detene nan, Mando Policial a suspende nan mesora como medida disciplinario.