Recientemente Quota International Inc. a tene nan Reunion Annual pa Region 10 cu a tuma lugar na Landgoed Zonheuvel Doorn, na Hulanda, unda a nombra e Regional Director 2108-2020 den persona di Gwendeline van Trikt-Rojer di Quota International Aruba.
Gwendeline van Trikt-Rojer ta un miembro activo di Quota desde 2011 y a ocupa diferente puestonan den directiva di Quota International Aruba, entre otro, Director di Development & Growth 2013-2014, Director di Service Projects 2014-2015, Vice-Presidente 2015-2016 y Presidente di 2016-2017.
Durante e reunion aki, tur Quota Club di Region 10 a topa otro y hunto a eligi un Regional Director nobo, cual funcion ta encera e tarea pa representa Quota International Inc pa dos aña consecutivo y tin cu lidera y supervisa e region. Alabes e meta di e reunion anual aki ta pa intercambia ideanan pa proyectonan na benficio di comunidad y pa sigui enforsa metanan di e oganisacion. Un total di 60 miembro a participa.
Region 10 di Quota International Inc. ta consisti di e siguiente Quota Clubnan:
- Quota International of Aruba
- Quota International of Curacao
- Quota International of Curacao Silver
- Quota International of St. Eustatius
- Quota International of Trinidad & Tobago
- Quota International of Suriname
- Quota International of Amsterdam-Hulanda
- Quota International of Rotterdam -Hulanda
- Quota International of Zeist -Hulanda
Presente tambe na e reunion importante aki tabata Presidente di Quota International Inc., Marie Dawson, kende a biaha specialmente for di Canada pa Hulanda pa atende e reunion.
Durante parti di celebracion, Presidente di Quota International Inc., Marie Dawson hunto cu Regional Director saliente di Region 10, Valentina Cijntje-Engelhardt a haci e acto ceremonial oficial y anuncia cu e Regional Director 2018-2020 pa Region 10 ta Gwendeline van Trikt-Rojer di Aruba!
Quota International Inc. ta un organisacion internacional di servicio consistiendo solamente di hende muhe ehecutivo cu ta traha boluntariamente pa yuda instancianan cu ta traha cu personanan cu limitacion di oido, hende muhe y muchanan den situacionan di abuso y esunnan mas vulnerabel den nos comunidad.
Quota International Inc. ta na vispera pa cumpli 100 aña di existencia y ta consisiti di 16 region internacional reparti full rond mundo. Cada region tin nan Regional Director cu ta representa nan internacionalmente na e Quota Clubnan corespondiente di nan region.
Meta di Quota International Inc. ta pa contribui na desaroyo positivo den comunidad local y internacional. Quota ta aporta na conscientisa y educa nos comunidad cuminsando for di nos muchanan por medio di nan proyectonan anual den diferente categoria cu ta cay bou di locual cu Quota International Inc. ta dedica na dje;
- Esunnan cu deficicienca di oido y habla
- Esunnan cu ta mas vulnerabel den nos comunidad, esta hende muhenan den dificultad, muchanan, hobennan y nos grandinan
- Esunnan desafortuna cu limitacion incapacita social y fisico
- Conscientisacion y desaroyo di formacion intelectual di nos muchanan y hobennan, na nivel local, internacional
- Contribui y aporta positivamente na cuido di esunnan cu ta sufri di cancer
Durante henter aña ta organisa eventonan, seminario y campañanan pa conscientisa comunidad di e problemenan di zonido duro pa oido di hende y tambe ta ofrece diferente oportunidad pa test oido gratis durante “Siman di Kibra Silencio, Cuida Bo Oido.”
Quota International Inc. ta gradici henter comunidad di Aruba pa semper coopera, aporta y sostene Quota International di Aruba, cu nan proyectonan pa hunto haci e diferencia positivo pa comunidad y ta desea Gwendeline van Trikt-Rojer hopi exito cu su tarea nobo como “Regional Director” di Region 10.
