Pa ocho aña largo pueblo di Aruba a conoce un gobierno cu a traha na interes di pueblo, traha pa yuda tur famia cu entrada abou, acomoda pensionadonan, a percura pa Alivia e costo di bida di tur ciudadano mas tanto cu por pero den un lapso cu ta menos cu ocho luna, otro gobierno di MEP, sin pena ni Gloria ta habraca tur esaki for di otro.
Prome di juli 2018 lo drenta historia politico di nos pais, como un fecha scur, un fecha caminda pueblo ta wordo castiga pa motibo di incapacidad y un mentalidad discriminatorio di politiconan cu ta scapa nan saco y esun di amigo- y famianan, rancando miyones for di cartera di nos pueblo.
Loke ta mas tristo ainda pa partido AVP, ta cu net un politico cu a wordo forma y educa den politica pa semper para hunto cu pueblo, sirbi interes di pueblo mas cu tur cos, a dicidi di uni su mes na e partido politico cu den historia di nos pais, a castiga e pueblo aki sin piedad.
“Ta c’un sabor amargo y un decepcion indescribibel pueblo ta mirando e cara y mentalidad berdadero di un gobierno cu simplemente tin como meta pa no sirbi pueblo, pa no cumpli cu tantisimo promesanan grandi haci na nos pueblo durante di campaña pero si pa sirbi nan mes y nan sponsornan, amigo y famianan.
Un pakete di medida cu ni e propio gobernantenan incapaz aki a realisa na principio e dolor y angustia economico inmenso cu nan ta causando nos pais y tur esaki pa falta di un vision, pa falta di conocemento y un incapacidad pa atende cu asuntonan di nos pais.
Sinembargo esaki no mester ta un sorpresa ya cu esunnan cu awe ta cargando responsabilidad di nos pais, tabatin ocho aña den oposicion haciendo tur cos cu nan trabou, buscando un forma pa yega na poder sin studia of crea un vision diferente den cual pueblo ta conoce e progreso cu e merece.
E storia di mega debe di politiconan cu awe ta gobernante, cu semper a insisti cu ta pueblo ta bay paga e mega debe aki, a dicidi di ranca mega placa for di cartera di nos pueblo, di nos hendenan cu lo bay pasa den situacionnan hopi dificil y hopi delicado den e dianan y kisas añanan nos dilanti.
Ta un falta di respet total pa scucha un Minister di Finansa cu den pasado a traha un rapport hunto cu su Prome Minister cu e titulo “Feestvierend ter onder gaan” awe e por cambia e titulo pa “Feestvierend met geld van onze volk,” duna un declaracion cu e crisisheffing aki, ta un medida cu ta primi pueblo solamente un tiki so.
UN falta di respet total pa principalmente esunnan di entradanan cu ta yega net net pa cubri nan gastonan pero loke ta tumando luga, hamas den historia politico di nos pais, a yega di tuma luga of nos a yega di presencia
Ningun otro gobierno den pasado, den un plaso di menos di 24 ora, a yega di anuncia medidanan asina drastico manera paga pa pikimento di sushi, hunto cu e participacion cu gasolin ta aumenta cu 9.3 cen, sin conta ainda ora cu e aumento di BBO y BAZV drenta na vigor diasabra mey anochi.
Na momento cu analisa e lista di aumento di pan cu Minister di Finansa a publica, e ta mustra cu for di diadomingo prome di juli, un kipashi blanco normal lo costa casi 5 florin, cu lo crea diferente situacion dificil pa hopi famia.
Esey ta solamente pa loke ta trata un kipashi, sin papia di beleg, di otro mercancia c’un famia ta bay tin mester di dje y riba cual nan lo tin cu paga 6% compara cu antes y ya caba por anticipa un desaroyo negativo hopi grandi pa henter nos pueblo,” Melvin Tromp di AVP ta mustra.
